په ننګرهار ولايت کې يوه مجرم ته تعزیري سزا ورکړل شوه
د ننګرهار ولایت د ده بالا ولسوالۍ د ابتدائیه محکمې د پرېکړې له مخې يوه کس ته د نامشروع اړيکو په جرم نن چهارشنبې د ۴/ ۵/ ۱۴۴۶ هـ ق نېټه تعزیري سزا ورکړل شوه.
په دې موخه جوړه شوې غونډه کې د یادې محکمې رئیس مفتي عبدالفتاح، قضائي او اداري کارکوونکو، د یادې ولسوالۍ ولسوال، د استخباراتو مدیر، امنیه قوماندانۍ مرستيال، د امر بالمعروف آمر، د یادې ولسوالۍ کارکوونکو او مراجعینو ګډون درلود.
غونډه د قرآن کريم د څو مبارکو آیاتونو په تلاوت پيل شوه؛ ورپسې د غونډې ګډونوالو د حدودو او تعزیراتو د ګټو او د ټولنې د اصلاح په اړه هر اړخيزې ویناوې وکړې.
ابتدائيه محکمې ياد مجرم پر ۳۹ دُرو تعزیري سزا محکوم کړی و؛ چې ياده پرېکړه د سترې محکمې د عالي مقام له تائيد وروسته پر مجرم تطبيق شوه.
