د کندهار د ښاري ابتدائيه محکمې لپاره نوى رئيس معرفي شو
د ٢٩/ ٣/ ١٤٤٥ هـ ق کال د کندهار ولایت د ښاري ابتدائیه محکمې پخوانى رئیس محترم شیخ مولوي ګل آغا، چې د امیرالمٶمنین (حفظه الله) د حکم په اساس د سترې محکمې د عالي مقام د تفتیش د رئيس په توګه او محترم مفتي حزب الله (ابراهیمي) د سترې محکمې د عالي مقام د تدقیق او مطالعاتو پخوانى رئيس د مشرتابه عالي مقام د یاد حکم په اساس د کندهار ولایت د ښاري ابتدائیه محکمې د رئيس په توګه تبدیلاً مقرر شوی دى، نو په دې اساس د کندهار ولايت د مرافعه محکمې رئیس الحاج مولوي عبد الغفار (بحر) له لورې د يوې غونډې په ترڅ کې د کندهار د ښاري ابتدائيه محکمې کارکوونکو ته ور وپېژندل شو.
د معرفت او پېژندنې په دغه غونډه کې د کندهار ولايت د مرافعه محکمې رئیس محترم مولوي عبد الغفار بحر د خبرو پر مهال، د پخواني رئیس د کړنو او فعاليت ستاينه وکړه او په نويو دندو کې يې دواړو رئیسانو ته د الله (جل جلاله) له دربار څخه د لا ښه خدمت د توفيق غوښتنه وکړه.
په ياده غونډه کې د کندهار ولايت د ښاري ابتدائیه محکمې نوي رئیس محترم مفتي حزب الله ابراهيمي وويل، تر خپل وس او توان به کوښښ کوم چې د کندهار شريف ولس ته ښه خدمت وکړم.
ياده غونډه د دعا په ويلو سره پاى ته ورسېده.
