د کندهار د مرافعه محکمې د رئیس په مشرۍ اداري ناسته ترسره شوه
د سه شنبې په ورځ (۶/۲/۱۴۴۵) نېټه دکندهار ولایت د مرافعه محکمې د دېوانونو رئیسانو، د یادو دېوانونو غړو د تحریراتو د رئیس او وثایقو د امر ترمنځ اداري غونډه ترسره شوه .
یاده غونډه چې د مرافعه محکمې د رئيس محترم شیخ عبدالغفار(بحر) صاحب په مشرۍ دکندهار د مرافعه محکمې د ریاست مقام په دفتر کې جوړه شوې وه، د قرآنکریم د مبارکو آیاتونو په تلاوت پيل شوه، وروسته محترم بحر صاحب وینا وکړه او د ناستې ګډونوالو ته یې لاندې هدایات وکړل:
- دکندهار ولایت د محاکمو ټول قاضیان مکلف دي چې د سترې محکمې د دارالانشاء محترم ریاست ټول متحدالمآلونه ښه په غور مطالعه کړي او په ورځني قضائي او اداري موضوعاتو کې يې تطبیق کړي.
- د ابتدائيه محاکمو د چارو د نظارت اوکتنې په موخه دې په دوامداره توګه مؤظف پلاوي سفر وکړي او هیئت دې هغه دویم ځل نقض قضیې چې ابتدائيه محاکمو د مرافعه دېوان د رهنمودي قرار مطابق عمل نه دی کړی د ځان سره یوسي او له مربوطه محکمې نه دې د نه عملي کېدو پوښتنه وکړي، ترڅو په راتلونکي کې د مرافعه محکمې د دېوانونو په رهنمودي قرارونو عمل وکړي.
- د ولسوالیو د قاضیانو سره په هرو درېیو میاشتو کې یو ځل ناسته ترسره کیږي، ترڅو شته مشکلات او ستونزې یې حل شي.
- د ښاري ابتدائيه محکمې د دېوانونو رئيسان دې په میاشت کې یو ځل د مرافعه محکمې د دېوانونو د رئيسانو غونډه کې ګډون وکړي.
- په راغلو استهداګانو باندې دې د مرافعه محکمې د دېوانونو مفتي صاحبان څېړنه او تدقیق وکړي او په اونۍ کې یوه ورځ (دوشنبه) دې ناسته وکړي او خپله څېړنه دې د خپل دېوان د رئيس سره شریک کړي، ترڅو یې په اړه د دېوانونو د رئيسانو په غونډه کې په توافق د نظر تصمیم ونیول شي.
چې پورته هدایات د رئيس صاحبانو او اعضاء وو له خوا تائيد او توافق د نظر پرې وشو.
یاده غونډه د دعا په ویلو پای ته ورسېده.
