د پکتیا ولایت د استیناف محکمې رئيس د دغه ولایت د محبس له رئيس سره وکتل
د ۱۴۴۴ ه ق کال د ۱۱مې میاشتې په ۷مه نېټه د پکتیا ولایت د استیناف محکمې عمومي رئيس محترم مفتي امان الله «منقادحقاني» د دغه ولایت د محبس له رئيس محترم مولوي سهیل «سعید» او ورسره مل پلاوي سره په خپل کاري دفتر کې ناسته ترسره کړ.
په یاده ناسته کې د پکتیا ولایت د استیناف محکمې عمومي رئیس له محبس څخه راغلي پلاوي ته ښه راغلاست ووایه او په خپلو خبرو کې یې د محاکمو او د محابسو اړیکو ته په اشاره وویل، محبسونه دې تر خپله وسه پورې له محاکمو سره همکار واوسي ترڅو د بندیانو اجرائیوي چارې له ځنډ او خنډ سره مخ نشي.
مفتي امان الله «منقاد حقاني» پخپلو خبرو کې د پکتیا ولایت د محبس رئيس او ورسره مل پلاوي ته سپارښتنې وکړې چې د بندیانو د اوسېدو ځای او هغوی ته نورې لازمې اسانتیاوې په منظیمه توګه برابر کړي.
همدارنګه د محاکمو او محابسو د اداري چارو په تړاو یې د ناستې ګډونوالو ته مفصلې او زرینې خبرې وکړې.
په یاده ناسته کې اصولو ته په کتو سره د محبوسینو په اړوند لازم تصمیمونه ونیول شول او ناسته د دعاء په ویلو سره پای ته ورسېده.
