د ننګرهار ولايت د مرافعه محکمې سرپرست رئیس او ورسره مل پلاوي د مرکزي زندان او ځينو ادارو څخه ليدنه وکړه
يکشنبه او چهار شنبه چې د ۲۶/ ۵/ ۱۴۴۵ھ ق او د ۲۹ /۵/ ۱۴۴۵ ھ ق نېټو سره سمون خوري د ننګرهار ولایت د مرافعه محکمې سرپرست رئيس مفتي ذبيح الله (ساجد) او ورسره مل پلاوي د زندانونو چارو سمون ریاست څخه د لیدنې تر څنګ د چپرهار، پچیراګام، خوګیاڼي، سرخرود، شېرزاد او حصارک ابتدائيه محاکمو او توقیف خونو څخه لیدنه وکړه.
د مرافعه محکمې رئیس او ورسره مل پلاوي د ننګرهار ولایت د زندانونو چارو سمون ریاست بېلا بېلو برخو څخه ليدنه وکړه، چې له برخي يې په پخلنځي کې د ډوډۍ وضعیت، د زندانيانو لپاره د جوړ شوي کلینک ودانۍ او بستر خونې له نږدې وليدې.
سرپرست رئيس مفتي ذبیح الله ساجد په دې سربېره له یو شمېر زندانیانو سره خبرې وکړې او د دوی عمومي ستونزې یې واوریدې، چې د یادې لیدنې څخه هدف له زندنیانو سره د مسؤلینو د چلند، خوراک او د هغوی د دوسیو په تړاو معلومات ترلاسه کول وو، چې تر کومې کچې څېړل شوي او اجراآت یې په څه ډول روان دي.
ښاغلي مفتي ذبيح الله ساجد صاحب زیاته کړه چې د دوسیو پر څېړلو به تأکید کيږي او له زندانیانو سره به هیڅ ډول غیر قانوني چلند نه کیږي.
د ننګرهار ولایت د مرکزي زندان له ليدلو وروسته يې د چپرهار، پچیراګام، خوګیاڼي، سرخرود، شیرزاد او حصارک ابتدائيه محاکمو اداري او قضائي چارو څخه له نږدې ليدنه وکړه او د محاکمو قضائي او اداري پرسونل یې په خپل منځ کې هماهنګي ته راوبلل، هغوی ته يې په چارو کې د لا ښه والي او په اجراآتو کې په سرعت سره د رسیده ګي تأکید وکړ، همدا راز يې د مراجعینو شکایتونه واورېدل او د حل په مورد یې د اړونده څانګو مسؤلینو ته د ښه سلوک او چلند توصیه وکړه.
