د لوګر د استیناف محکمې رئیس د دې محکمې له قضاتو سره د محاکمو د چارو د لابهبود په موخه جلا، جلا ناستې ترسره کړې
د لوګر ولایت د استیناف محکمې رئیس مولوي روحالله عبدالسلام د روان هجري قمري کال د رجب میاشتې په ۱۵/۱۶ او ۱۷ نېټو د محاکمو د چارو د لاسمون په موخه د استیناف محکمې ریاست په انګړ کې د دې محکمې له قضائي مسؤولینو سره جلاــ جلا ناستې ترسره کړې.
د یادو لیدنو عمده موخې د روان هجري قمري کال د دوسیو څېړنه، له یو بل سره د تجربو شریکول، د شته ستونزو حل او فصل، د کارونو روڼتیا او چټکتیا ته د قضاتو هڅول او د ریاست او دېوانونو ترمنځ د همغږۍ رامنځته کول وو.
یادې ناستې چې د استیناف محکمې له مدني ، جزاء او امنیت عامه دېوانونو له مسؤولینو سره ترسره شوې په نوبت سره په لومړیو کې د هر دېوان مشکلات واورېدل شول او د یادو مشکلاتو د حل په لارو چارو تفصیلي بحث ترسره شو؛ ورپسې د هر دېوان د قضائي اجراآتو ځینې نمونې وکتل شوې او مسؤولینو ته د شته نیمګړتیاوو د حل توصیه او لارښوونه وشوه.
د یادې ارزیابۍ په پای کې د استیناف محکمې رئیس د ښاري محکمې د قضائي مسؤولینو هڅې وستایلې او دوی ته یې د مسؤولیتونو د ښه ترسره کولو دعا وکړه.
د استیناف محکمې قضائي منسوبینو یادې ناستې مثبتې وګڼلې او له عمومي رئیس څخه یې مننه وکړه چې تل یې دوی خپلو دندو ته هڅولي او د شته نیمګړتیاوو په حل کې یې ورسره مرسته کړې.
د محاکمو مسؤولینو غوښتنه وکړه چې په راتلونکي کې دې هم دغه ډول ناستو ته دوام ورکړل شي.
