د لغمان ولایت د مرافعه محکمې رئیس له پنځو ابتدائیه محاکمو لیدنه وکړه
د لغمان ولایت د مرافعه محکمې رئیس محترم مفتي عبدالله(فرقاني) د ۱۴۴۴هـ ق کال د جمادي الثاني میاشتې په ۱۶مه او ۱۷مه نېټه د دغه ولایت پنځو ولسوالیو (علینګار ،علیشنګ، قرغه یي ،دولت شاه او بادپښ) ته د سفر پر مهال د یادو ولسوالیو له ابتدائیه محاکمو لیدنه وکړه.
د استیناف محکمې رئیس د یادو ولسوالیو پر ابتدائیه محاکمو سربېره د لغمان ولایت د ښاري محکمې څخه هم لیدنه وکړه.
د استیناف محکمې رئیس د دغه سفر او لیدنو موخه له مرکز سره د ولسوالیو د ابتدائیه محاکمو د اړیکو تقویه، خپلو اړوند چارو ته د قضاتو تشویق او حاضرۍ ته د محاکمو د مسؤولینو او منسوبینو پابندي وبلله.
د استیناف محکمې رئیس په دې لیدنه کې د محاکمو اجراآت ارزیابي کړل او د هغوی ستونزې، وړاندیزونه او نظرونه یې واورېدل.
دغه راز محترم مفتي عبدالله(فرقاني) د محکمو منسوبینو ته لازم هدایات ورکړل وویل، په خپلو کړنو کې له صداقت، ایماندارۍ او شفافیت څخه کار واخلئ، الله تعالی حاضر او ناظر وګڼئ، د مراجعینو ستونزې او خبرې په پوره حوصله سره واورئ او نېک چلند ورسره وکړئ ترڅو عدالت په ښه توګه تأمین شي.
