د سترې محکمې د قضائي  پلټنې عمومي ریاست مسلکي پلټونکو د کندز ولایت له محاکمو او مرکزي زندان څخه لیدنه وکړه

د سترې محکمې د محترم مقام او د قضائي تفتیش د عمومي ریاست د محترم معاون حافظ مولوي عبدالولي(محمود) په هدایت د یاد ریاست یوه مؤظف پلاوي چې په تشکیل کې یې مولوي عبدالوارث(سعید)، مولوي رحمن الدین (ایشان) او مولوی عبدالله (ذکي)  شامل وو، د مولوي سیف الرحمن (ذاکر) په مشرۍ د ۱۴۴۵ هجري قمري کال د  محرم میاشتې په (۶مه) نېټه د کندز ولایت د محاکمو د تېرو فعالیتونو د څېړنو په موخه  یاد ولایت ته سفر وکړ.

یاد پلاوي د خپل سفر په پیل کې د کندز ولایت د مرافعه محکمې له رئیس صاحب سره وکتل، ورپسې یې د بندیانو د ستونزو د څېړلو په موخه د کندز ولایت له مرکزي زندان (محبس) څخه لیدنه وکړه او د نارینه او ښځینه بندي زندانیانو بشپړ شهرت، کیفیت او شکایتونه یې له ځان سره نوټ او بیا یې د هر بندي شکایت د اړوند محاکمو له مسؤولینو سره شریک کړ.

دغه راز د خپل کاري پلان له مخې یې د یاد ولایت د ( 9 ) ولسوالیو د ابتدائیه محاکمو، ښاري او مرافعې محاکمو د ریاستونو او اړونده دېوانونو څخه جلا، جلا لیدنه وکړه.

د نوموړي هیئت د پلټنیز بهیر په ترڅ کې د یادو محاکمو د قضائي، اداري او مالي چارو هر اړخیزه پلټنه تر سره شوه چې د محاکمو د قضائي او اداري کارکوونکو د سلوکي او مسلکي اړخونو په اړه يې بشپړ معلومات و اخیستل شول او د چارو د سمون په برخه کې ورته لازمې لارښوونې وشوې.

یاد هیئت د محاکمو اړوند شته ستونزې، کاري خنډونه له ځان سره نوټ کړل او په لومړي قدم کې يې د ښاري محکمې په دېوانونو کې شته مشکلات د یادې محکمې له رئیس صاحب سره شریک کړل، ورپسې یې د ستونزو د هواري، د خنډونو د له منځه وړلو او د نیمګړتیاوو د اکمال په اړه د کندز ولایت د مرافعه محکمې له ریاست سره تفاهمي ناسته ترسره کړه او ټول مشکلات یې په جلا، جلا توګه ورسره شریک کړل.

د سترې محکمې د قضائي تفتیش هيئت د خپل سفر په جریان کې له ټولو اړوند ولایتي مسوولينو سره لیدنه وکړه او د محاکمو د فعالیتونو د لا ښه پرمختګ او د ځينو مربوطه ستونزو د حل په باره کې د هغوی نظرونه واورېدل.

د قضائي تفتیش د پلټنې هیئت د ۱۴۴۵ هجري قمري کال د محرم د میاشتې په (22مه) نېټه خپل سفر په داسې حال کې چې له لاسته راوړنو ډک وو پای ته ورساوه.