د سترې محکمې د عالي مقام په حکم او جنوب غرب زون د تمیز لوی ریاست په هدایت به د هرات له زندان څخه څه باندې (۴۷۳) بندیان آزاد شي
د سترې محکمې د عالي مقام او جنوب غرب زون د تمیز لوی ریاست په هدایت به د انساني ترحم او شفقت له وجې د هرات ولایت له عمومي زندان څخه څه د پاسه (۴۷۳) هغه زندانیان ازاد شي چې په حقوق الله کې بندیان وو، یا یې د حبس کمه موده پاته ده.
د سترې محکمې د جنوب غرب زون د تمیز عالي مقام د هرات د مرافعه محکمې د ریاست په وړاندیز د جنوب د غرب زون د تفتیش یوه درې کسیزه پلاوي ته دنده وسپارله چې د یاد ولایت له زندان څخه لیدنه وکړي، د زندان او زندانیانو وضعیت له نږدې بررسي او په اړه یې بشپړ معلومات شریک کړي.
د یاد درې کسیزه پلاوي د دوه ورځنۍ بررسۍ په نتیجه کې معلومه شوه چې د هرات زندان ودانۍ ته د زلزلې له امله زیان رسېدلی دی او د نړېدو خطر لري.
دغه راز یاد پلاوي د هرات په زندان کې د هغه (۴۷۳) بندیانو نوملړ ترتیب او د جنوب غرب زون د تمیز له عالي مقام سره شریک کړ چې په حقوق الله کې بندیان وو، یا یې د حبس کمه موده پاته وه.
د جنوب غرب زون د تمیز عالي مقام، د زندانیانو د یاد نوملړ تر کتنې وروسته د یوه مکتوب له لارې د هرات مرافعه محکمې ته هدایت کړی چې د یادو زندانیانو د خوشي کېدو درته اجازه ده او هر څومره ژر چې امکان لري دغه بندیان خوشي کړئ؛ ترڅو په محبس کې د بندیانو حجم کم او د زلزلې په صورت کې د پاتې بندیانو تر خپلې وسې حفاظت وشي.
پر دې سربېره د جنوب غرب زون د تمیز عالي مقام اړوند مسؤولینو ته هدایت کړی چې د ښځو او کوچنیانو په محبسونو کې چې اوس مهال یې هیئتي روانه ده او تر اوسه یې لېستونه نه دي را رسېدلي د خپل لزوم دید مطابق بندیان ازاد کړي.
