د سترې محکمې د دعوت او ارشاد ریاست له ټولو اداري کارکوونکي ازموینه واخیسته
د پنجشبنې په ورځ چې د روان ۱۴۴۴ هـ ق کال د شعبان میاشتې له۲مې ڼېټې سره برابره ده د سترې محکمې د دعوت او ارشاد ریاست د یادې ادارې له ټولو کارکوونکو دیني ازموینه واخیسته.
د ازموینې په پیل کې د سترې محکمې د دعوت او ارشاد رئیس محترم حافظ مولوي عبدالعزیز صاحب د دیني علومو د زده کړې د اهمیت او لازمیت په اړه اصلاحي بیان وکړ.
نوموړي ټولو کارکوونکو ته وویل، د دیني علومو زده کړه په هر مسلمان فرض ده، دعوت او ارشاد ریاست به له ابتداء تر لوړې کچې د سترې محکمې کارکوونکو ته دیني علوم ورزده کوي.
محترم حافظ مولوي عبدالعزیز صاحب ډاډ ورکړ چې د سترې محکمې د دعوت او ارشاد ریاست د منظم تدریس په نتیجه کې به یوه ورځ ټول کارکوونکي تر ډېرې اندازې په دیني علومو پوه وي.
ورپسې د سترې محکمې د دعوت او ارشاد ریاست محترم مدرس مفتي ضیاءالحق صاحب د ازموینې ګډونوالو ته د ازموینې په اړه بشپړه لارښوونه او رهنمايي وکړه وویل، نننۍ ازموینه ډېره اسانه ده، په ارام فکر پوښتنې حل کړئ.
باید وویل شي چې د سترې محکمې اړوند د دعوت او ارشا ریاست د خپل پلان له مخې په اوونۍ کې د دوو ورځو اصلاحي بیانونو سربېره د سترې محکمې د مرکزي ریاستونو ټولو کارکوونکو ته د دیني علومو تدریس هم کوي.
