په خوست ولایت کې دوو متهمينو ته تعزیري سزا ورکړل شوه
د خوست ولایت د ځاځي میدان ولسوالۍ د ابتدائیه محکمې د پرېکړې په اساس دوو کسانو ته چې پر لواطت متهم وو؛ په ۱۱/ ۴/ ۱۴۴۶ هـ ق نېټه په عام محضر کې تعزیري سزا ورکړل شوه.
ابتدائیه محکمې د متهمينو له ډلې یو متهم پر يو کال او شپږ میاشتې تنفیذي بند او ۳۵ دُرو تعزیري سزا او دويم متهم په یو کال تنفیذي بند او ۳۰ دُرو تعزیري سزا محکوم کړی و؛ چې ياد حکم د سترې محکمې د عالي مقام له تائید وروسته پر متهمينو تطبيق شو.
د تعزیري سزا د تطبيق په موخه جوړې شوې غونډه کې د مرافعه محکمې عمومي رئیس او مل پلاوي، د یادې ولسوالۍ قضائي، نظامي، اداري مسؤولينو او عامو هېوادوالو ګډون درلود.
غونډه د قرآن کریم د څو مبارکو آیاتونو په تلاوت پیل شوه؛ ورپسې د امر بالمعروف ریاست محتسب او د عامه امنیت دېوان سرپرست د موضوع اړوند وینا وکړه.
د غونډې په دوام د مرافعه محکمې رئیس د موضوع په اړه تفصیلي خبرې وکړې، د یادې پرېکړې پلي کول يې د قانون حاکمیت او د شرعي حدودو د تطبیق لپاره یو مهم ګام یاد کړ.
غونډه د تعزیزي سزا له تطبيق وروسته د دعا په ويلو پای ته ورسېده.
