د ننګرهار د مرافعه محکمې رئيس د ياد ولايت د اسنادو د ثبت، وثايقو او مخزن له آمريت څخه ليدنه وکړه
د دو شنبې په ورځ (۱۰ / ۷ / ۱۴۴۵هـ ق نېټه) د ننګرهار ولايت د مرافعه محکمې رئیس محترم مولوي عبدالشکور (رشاد اخندزاده) د ياد ولايت د اسنادو د ثبت، وثایقو او مخزن له آمریت څخه لیدنه وکړه.
په ياده ليدنه کې د ننګرهار د مرافعه محکمې رئیس د ياد آمریت له اجراآتو څارنه وکړه، د قضائي او اداري کارمندانو، د صادرې او واردې کتاب او د اړوندې شعبې ټول د وثایقو کتابونه يې وکتل، د ځينو ستونزو د حل په اړه د اړونده شعبو مسؤولینو ته لازمې سپارښتنې وکړې.
د ليدنې په دوام د مرافعه محکمې محترم رئیس وویل، د دې لیدنې څخه موخه دندو ته د قضائي او اداري کارکوونکو متوجه کول، د مراجعینو ستونزو ته پر وخت رسېدنه او په ښه ډول د چارو ترسره کول وو.
نوموړي د محاکمو قضائي او اداري کارکوونکي په خپل منځ کې ښې همغږۍ ته وهڅول او هغوی ته يې په چارو کې د لا ښه والي په موخه لازم هدایت وکړل.
