د میدان وردګ ولایت د مرافعه محکمې رئیس د سیدآباد او جغتو ولسوالیو له ابتدائیه محاکمو لیدنه وکړه
د روان ۱۴۴۵هجري قمري کال د صفر المظفر میاشتې په ۲۱ او ۲۲مه نېټه د میدان وردګ ولایت د مرافعه محکمې رئيس ښاغلي مولوي عبدالکریم (حقاني) په مشرۍ یوه پلاوي د سیدآباد او جغتو ولسواليو له ابتدائیه محاکمو څخه لیدنه وکړه.
یاد پلاوي د محاکمو په قضائي او اداري برخه کې د فیصلو، قرارونو، وثایقو، د اندراج، د عرایضو د ثبت، واردې او صادرې له کتابونو او نورو ګڼو چارو څخه بررسي او ارزونه وکړه.
د مرافعه محکمې رئیس په اصولي توګه او ټاکلي وخت د مراجعینو د چارو ترسره کولو برخه کې د یادو ولسوالیو د ابتدائيه محکمو مسؤولینو ته لازمې سپارښتنې وکړې او زیاته یې کړه، د اصولو، مقرراتو او حاضرۍ پابند اوسئ.
پر دې سربېره د مرافعه محکمې رئیس د دوسیو پر ژر فیصله کولو باندې هم دوی ته ټینګار وکړ، د یادو ابتدائیه محاکمو د مسؤولینو ستونزې یې واورېدلې او د حل په برخه کې یې ورسره ژمنه وکړه.
سر بېره پر دې د مرافعه محکمې دغه پلاوي د یادو ولسوالیو له ولسوالانو، امنیه قوماندانانو، د استخباراتو او امر بالمعروف او نهی عن المنکر له مسؤولینو سره لیدنه وکړه او د تل پاتې همکارۍ په برخه کې يې یو بل ته ډاډ ورکړ.
