د پکتیکا د مرافعه محکمې رئیس د حج او اوقافو له رئیس او علماوو شورا له مسؤولینو سره وکتل
د پکتیکا ولایت د استیناف محکمې رئیس په (۲۶ /۹ /۱۴۴۴هـ ق) نيټه د یاد ولایت د حج او اوقافو د رئیس په ګډون د علماوو شورا له رئیس او غړو سره ناسته ترسره کړه.
په یاده ناسته کې چې د پکتیکا ولایت د استیناف محکمې په تالار کې جوړه شوې وه او د استیناف محکمې رئیس محترم الحاج مفتي عبیدالله «خالد» د یاد ولایت د علماؤو شورا رئیس، غړو او د حج او اوقافو رئیس په کې ګډون درلود، د مرافعه محکمې رئیس د یولړ مهمو موضوعاتو تر څنګ د محاکمو په چارو کې د نه مداخلې په اړه هم خبرې وکړي وویل، محاکم مستقل دي، هېڅوک نشي کولای چې د محکمې له حکم پرته یو کس مجازات او یا له بند څخه آزاد کړي.
محترم مفتي عبدالله (خالد) زیاته کړه، له مرکزي زندان، توقیف خانو او د ولسوالیو له زندانو څخه به وخت ناوخت لیدنه کوو، ترڅو د بندیانو ستونزو ته په کې رسېدنه وشي.
په یادو مواردو سربېره په ناسته کې د غلا، اختطاف او نورو جرایمو د کنټرول او مخنیوي او ځینې نورو ضروري مواردو په اړه هم خبرې وشوې.
دغه راز د پورته مواردو په اړه د ولایت په سطحه د مسؤولو چارواکو سره د ناستې جوړولو په اړه خبرې وشوې ترڅو په راتلونکي کې د ناوړه پېښو او عامه امنیت د اخلال سبب نشي.
