د هیواد د ۳۴ ولایتونو د حقوقو امرینو ته د اداري او مسلکي وړتیا لوړولو په موخه سیمینار جوړ شو

د روان ۱۴۴۵ هـ ق کال د صفرالمظفر میاشتې په ۱۵مه نېټه کابل کې د حقوقو عمومي ریاست لخوا د دغه ریاست په تالار کې د هیواد د ۳۴ ولایتونو د حقوقو امرینو ته د اداري او مسلکي وړتیا لوړولو په موخه دوه ورځنی سیمینار جوړ شو.

دغه سیمینار کې د هیواد ۳۴ ولایتونو د حقوقو پر امرینو سربېره یو شمېر اداري کارکوونکو هم ګډون درلود.

د سیمینار په پیل کې ګډونوالو ځانونه معرفي کړل، ورپسې د حقوقو عمومي رئیس محترم مفتي ابراهیم جان ابوالحفاظ د سترې محکمې په تشکیل کې د حقوقو ادارې د مسلکي او اداري چارو پر ارزښت، د حقوقو ریاست د کارکوونکو تر منځ د همغږۍ او یووالي رامنځته کولو، په خپلو منځو کې د کاري تجربو شریکولو، په حقوقي دعوې یا شخړو کې د مصالحې او د مصالحې له لارې د حقوقي قضیو د حل او فصل پر ارزښت او د محاکمو د فیصلو د تطبیق او تنفیذ په ارزښت تفصیلي خبرې وکړې.

د ښاغلي مفتي محمدابراهیم جان (ابوالحفاظ) تر وینا او د سیمینار د ګډونوالو تر معرفت وروسته، سیمینار د اجنډا مطابق لومړی د حقوقو عمومي ریاست د حقوقي کارپوهانو آمریت د املاکي کمېټي مسلکي غړي محترم محمد عارف  (صباح) په خپل وار سره د حقوقو د حاصلو د څرنکوالي قانون د مسودې په اړه لازم توضیحات ورکړل، دغه راز یې د حقوقو ادارې د اجرائیوي چارولکه(د عریضو ثبت، د دوسیود ثبت دفتر، جلب پاڼې، ضمانت خطونو او نورو کاري جدولونو او دفترونو په هکله لازم معلومات ورکړل.

ورپسې د کابل ولایت د حقوقو رئیس محترم مولوي عبدالمتین (عمري) د مصالحې له لارې د حقوقي قضیو د حل او فصل د پروسې په اړه د حقوقو آمرینو ته  پوره توضیحات ورکړل.

پر دې سربېره د کابل ولایت د حقوقو ریاست د دویم زون د حقوقو آمر محترم عنایت الله (اشرفي) لخوا د حقوقي قضیو(موضوعي او حوزوي صلاحیتونو) او محکمو ته د دوسیو د لېږلو د پروسې او څرنګوالي په برخه کې تدریس وکړ.

په همدې ترتیب د کابل ولایت د حقوقو ریاست د محاکمو د قطعي یا نهايي حکمونو د تطبیق او تنفیذ آمر ښاغلي  مولوي محمد نادر (سعادت) د حقوقي قضیو د محاکمو قطعي یا نهايي  شوو فیصلو د تطبیق او تنفیذ د پروسې په اړه پوره جریان او څرنګوالی واضح او بیان کړ.

دغه راز د سیمینار ګډونوالو ته پوښتنلیکونه ووېشل او او د تدریس شوو موضوعاتو په اړه د جوړو شوو پوښتنو په تړاو د سیمینار د ګډونوالو ځوابونه وغوښتل شول.

د یاد سیمینار ګډونوالو ته د سترې محکمې اداري معاون محترم شیخ عبدالمالک (حقاني) په خپله اختتامیه وینا کې د حقوقو عمومي ریاست لخوا د یاد ریاست اړوند ولایتي مسؤولینو او اداري کارکوونکو ته د دغه ډول سیمینار جوړل وستایل او زیاته یې کړه، د اصولو، مقرراتو او مشرتابه د هدایاتو او اوامرو په رڼا کې په پوره امانتدارۍ د هیوادوالو مشکلاتو او موضوعاتو ته رسېدنه وکړئ.

د سترې محکمې اداري معاون محترم شیخ عبدالمالک (حقاني) صاحب وویل، اداري چارې د بشر پر نظرونو او افکارو پورې نه دي تړلې؛ بلکې موږ په اسلام کې هر کار (که هغه اجتماعي یا‎ دفتري وي) ترسره کولو لپاره اصول او لوایح لرو چې دغه اصول او لوایح د اسلام د اساساتو او بنسټونو او منابعو لکه قرآن، نبوي سنت او د مجتهدینو اجتهاد څخه سرچینه اخلي، چې اړوند مسؤولین هم له همدې منابعو څخه په ګټه اخیستنې سره خپل اصولنامې او مقررات ترتیبوي.

دغه راز محترم شیخ عبدالمالک (حقاني) څرګنده کړه، د چارو سرته رسول لکه یوه فریضه ده؛ ځکه درسپارل شوې دندې د خدای (جل جلاله) له لوري تاسو ته یو مسؤولیت، نبوي تعهد او اسلامي نظام او خلکو سره ژمنه ده؛ که څوک د دغې فریضې سره ته رسولو کې د شریعت اصولو، لوایحو او مقرراتو ته توجه ونه کړي او د شخصي، قومي او سمتي اړیکو په نظر کې نیولو سره کار وکړي پایله یې د اسلامي امارت د نظام ناکامي او د خلکو تباهي ده.

د سیمینار په پای کې له ګډونوالو څخه غوښتنه وشوه چې د سیمینار اړوند موضوعات د خپلو ادارو اړوند مامورینو ته ورسوي.