د قضائیه قوې د محاکمو امنیتي او اجرائیوی چارو په عمومي ریاست کې د کارونو د ارزونې او د مسؤولینو د همغږۍ غونډه ترسره شوه
د روان ۱۴۴۵ هـ ق کال د جمادی الأولی میاشتې په ۸مه نېټه د قضائیه قوې د محاکمو امنیتي او اجرائیوی چارو عمومي ریاست کې د یاد ریاست د مدیریتونو او آمریتونو د تېرې اوونۍ د کارونو د ارزونې او د مسؤولینو ترمنځ د همغږۍ د لا ډېرې تقویې په موخه غونډه ترسره شوه.
یاده غونډه چې د قضائیه قوې د محاکمو امنیتي او اجرائیوي چارو د عمومي رئیس محترم الحاج مولوي محمد عوض (سعید) صاحب په مشرۍ جوړه شوې وه او د نظامي محاکمو امنیتي او اجرائیوي قوماندانۍ سرپرست او رئیس ارکان حافظ سید حکمت الله آغا (ذهین)، د ریاست د دفتر عمومي مدېر مولوي خان محمد (مستغفر)، د پېژند عمومي مدیر مولوي نور محمد (قتیبه)، د تأمیناتو عمومي مدیر فرید احمد(همت)، د مخابرې عمومي مدیریت سرپرست مولوي موسی (افغان) او نورو مسؤولینو او منسوبینو په کې ګډون درلود، د قرآنکریم د مبارکو آیاتونو په تلاوت سره پیل شوه.
د قضائیه قوې د محاکمو امنیتي او اجرائیوي چارو عمومي رئیس محترم الحاج مولوي محمد عوض (سعید) په دې غونډه کې د مدیریتونو او آمریتونو د ښه کار ستاینه وکړه او د مسؤولیتونو پر لا ښه ادا کولو یې ټینګار وکړ.
دغه راز د تأمیناتو عمومي مدیریت ته سپارښتنه وشوه چې د ملکي او نظامي محاکمو امنیتي قطعاتو ته ژمنۍ البسه [ګرمې جامې، بوټان، کمپلې او ...) په ټاکلي وخت ورسوي.
غونډه د قضائیه قوې د محاکمو د امنیتي او اجرائیوي چارو عمومي ریاست د دفتر د عمومي مدیر مولوي خان محمد (مستغفر) لخوا په اختتامیه دعا سره پای ته ورسېده.
