د قضائي پلټنې عمومي رئیس د بامیان ولایت له محاکمو او مرکزي زندان څخه لیدنه وکړه
د سترې محکمې د محترم مقام په هدایت د قضائي تفتیش د عمومي رئیس محترم مفتي محمد ابراهیم جان (ابوالحفاظ) په مشرۍ د دغه ریاست یوه پلاوي چې محترم مولوي عبدالحی (اشرفي) او محترم مولوي عبدالرحمن (مخدوم) یې غړیتوب درلود، د ۱۴۴۴ هجري قمري کال د شعبان میاشتې په (۱۴)مه نېټه د بامیان ولایت د محاکمو د تېرو فعالیتونو د څېړلو په موخه یاد ولایت ته سفر وکړ.
یاد پلاوي د سفر په پیل کې د بامیان ولایت د مرافعه محکمې له رئیس صاحب سره لیدنه وکړه؛ ورپسې یې د بندیانو د ستونزو د څېړلو په موخه دغه ولایت له مرکزي زندان څخه لیدنه وکړه او د یاد محبس نارینه او ښځینه بندیانو بشپړ شهرت، کیفیت او شکایتونه یې له ځان سره نوټ او له اړوند محاکمو سره شریک کړل.
دغه راز یې د بې برخلیکه یا هغه بندیانو چې جرم یې کوچنی و او په توقیف کې یې ډېر وخت تېر شوی و د خلاصون په اړه ګډ تصمیمونه ونیول.
پر دې سربېره یاد پلاوي د خپل کاري پلان له مخې د بامیان ولایت د شپږو ولسوالیو له ابتدائیه محاکمو او د بامیان د مرافعه او ښاري محاکمو ریاستونو له اړوند دېوانونو څخه جلا، جلا لیدنه وکړه.
د سترې محکمې د قضائي تفتیش عمومي ریاست دغه پلاوي د پلټنیز بهیر په ترڅ کې د یادو محاکمو د قضائي، اداري او مالي چارو هراړخیزه پلټنه ترسره کړه، د محاکمو د قضائي او اداري کارکوونکو د سلوکي او مسلکي اړخونو په اړه یې بشپړ معلومات واخیستل او د چارو د سمون په برخه کې یې ورته لازمې لارښوونې وکړې.
یاد پلاوي د محاکمو اړوند شته ستونزې او کاري خنډونه له ځان سره نوټ کړل او په لومړي قدم کې یې د ښاري محکمې په دېوانونو کې شته مشکلات د ښارې محکمې له رئیس صاحب سره شریک کړل، په دویم قدم کې یې د ستونزو د هواري، د خنډونو د له منځه وړلو او د نیمګړتیاوو د اکمال په اړه د بامیان ولایت د مرافعه محکمې له رئیس سره تفاهمي ناسته ترسره کړه او ټول مشکلات یې په جلا،جلا توګه ورسره شریک او لازمي توصیې وکړې.
د قضائي تفتیش دغه پلاوي د محاکمو په وړاندې شته ستونزې او د خلکو شکایتونه په دقیق او هر اړخیزه توګه وڅېړل، د کارونو د لاسمون او د ادارو ترمنځ د همغږۍ د تقویې په موخه یې د یاد ولایت له محترم والي، امنیه قوماندان او د استخباراتو له معاون سره ګډه ناسته ترسره کړه.
پر دې سربېره یاد پلاوي د بامیان ولایت د محاکمو له برحاله قضاتو، مفتیانو او محررینو څخه یې ظرفيتي آزموینه واخیسته.
د قضائي تفتیش د پلټنې پلاوي د ۱۴۴۴ هجري قمري کال د شعبان میاشتې په (۱۸)مه نېټه خپل سفر په داسې حال کې چې له لاسته راوړنو ډک وو، پای ته ورساوه.
