د پکتیکا د استیناف محکمې رئیس د ارګون او یوسف خیل ولسوالیو له قضاتو سره وکتل
د پکتیکا ولایت د استیناف محکمې رئیس په (۲۶/۹/۱۴۴۴هـ ق) نېټه د رسمي چارو او کارونو د لاښه والي او پرمختګ په موخه داستیناف محکمې په تالارکې د یاد ولایت د ارګون او یوسف خېل ولسوالیو له قضاتو سره ولیدل.
په دې لیدنه کې د مرافعه محکمې عمومي رئیس محترم الحاج مفتي عبیدالله «خالد» د یادو محاکمو قضاتو ته د مشرتابه مقام د فرامینو او د سترې محکمې د متحد المآلونو د تعقیب او تطبیق، تقوا، حاضرۍ ته پر پابندۍ، د قضاء اړوند کارونو کې د اخلاص او صداقت او له مراجعینو سره د نېک چلند په اړه لازمې سپارښتنې وکړې.
همداشان یې محترمو قضاتو ته وویل، چې واردو شوو قضیو ته باید په وخت سره رسېدنه وکړي او له کوم شرعي عذر پرته د خلکو په دوسیو کې ځنډ واقع نشي؛ ترڅو پر محاکمو د خلکو د باور فضاء لا زیاته او د بې ځایه تکلیف مخنیوی شوی وي.
په دې ناسته کې ځینې ستونزې او مشکلات بیان شول چې الحمدلله تر ډېره ورته رسېدنه وشوه.
