د کابل د مرافعه محکمې اړوند د اسنادو د ساتنې مخزن کې د اسنادو د خوندي ساتلو لپاره (اور ضد) معیاري سیستم جوړ شو
د روان ۱۴۴۵ هـ ق کال د جمادی الأولی میاشتې په ۱۵مه نېټه د کابل د مرافعه محکمې اړوند د اسنادو د ساتنې مخزن کې د اسنادو د خوندي ساتلو په موخه د اطفائیې ریاست د مسلکي کارکوونکو په همکارۍ د (اور ضد) سیستم فعاله شو.
دغه راز د اطفائیې ریاست مسلکي کارکوونکو د کابل د مرافعه محکمې د اسنادو د ساتنې مخزن کارکوونکو ته د اور وژنې له ټولو وسایلو د ښې استفادې، د یادو وسایلو د ساتنې، د وسایلو د ساتنې د ځایونو، بېړني حالت او نورو ضروري مواردو برخه کې روزنیز سیمینار ورکړ.
د ياد روزنيز سيمينار په دوام ټولو ګډونوالو ته په دې اړه چې د اور وژنې له موادو څخه په کوم وخت کې په څه اندازه استفاده کېږي، څه وخت د اطفایې ریاست ته اطلاع ورکول اړین دي او داسې نور موارد وښودل شول.
