د هلمند ولایت د مرافعه محکمې د غونډې راپور
د چهارشنبې په ورځ (۱۶/ربیع الاول/ ۱۴۴۴ هـ ق نېټه) د هلمند ولایت د مرافعه محکمې د غونډو په تالار کې د دغه ولایت د مرافعه محکمې د رئیس مولوي سراج احمد (ابوسعید الغزنوي) په مشرۍ غونډه ترسره شوه.
په دې غونډه کې د مرافعه محکمې د ټولو دېوانونو قاضیانو، مفتیانو، محررینو او د ښاري محکمې د رئیس په شمول د ټولو دېوانونو قاضیانو، مفتیانو او محررینو ګډون کړی وو.
په غونډه کې د بندیانو په موضوعاتو خبرې وشوې او د بې برخلیکه بندیانو په اړه د عالیقدر امیرالمؤمنین حفظه الله د صادر شوي فرمان په عملي کولو ټینګار وشو.
د استیناف محکمې رئیس محترم مولوي سراج احمد (ابوسعید الغزنوي) قاضیانو ته په خطاب وویل چې قاضیان په حکم کې خپلواک دي او په حکم کې استهدا نشي غوښتلای.
دغه راز محترم (ابوسعید الغزنوي) قاضیانو ته د فیصلو د ترتیب او تنظیم په اړه لارښوونې وکړې او یاده غونډه د دعاء په ویلو سره پای ته ورسېده .
