د کندهار د مرافعه محکمې د عمومي رئيس په مشرۍ اداري غونډه ترسره شوه
په ۱۲ /۶ /۱۴۴۵هـ ق نېټه د کندهار ولایت د مرافعه محکمې د عمومي رئیس محترم شیخ غلام حضرت په مشرۍ او د دېوانونو د رئیسانو او غړيو، د اختصاصي محکمې د قاضي، د وثایقو آمر او د تحریراتو د رئیس په شتون کې اداري غونډه ترسره شوه.
یاده غونډه د قرآنکریم د څو مبارکو آیاتونو په تلاوت پیل شوه؛ ورپسې د مرافعه محکمې رئیس په خپله وینا کې ګډونوالو ته وویل، ټول قضائي او اداري کارکوونکي به خپلو کارونو کې پوره کوښښ کوئ، تر څو د الله (جل جلاله) د مخلوق کارونه په خپل وخت بې له کوم ځنډه اجرا شي، د دېوانونو رئیسان او غړي مکلف دي چې د ابتدائیه محاکمو کومې فیصلې چې له نقض سره مخ وي؛ ټکي په ټکي په دقيق ډول وګوري، ټولې نيمګړتياوې یې له حوالو او دلیل سره ورته په ګوته کړي.
دغه راز محترم رئيس زیاته کړه چې بې عذره څوک باید غير حاضري ونکړي او په رسمي وخت کې بې ضرورته نورو شعبو ته تګ او راتګ ونه شي.
د غونډې په دوام په راغلو استهداګانو هم بحث وشو او په اړه يې د شریعت د اصولو مطابق تصمیم ونیول شو.
یاده غونډه د دعاء په ویلو پای ته ورسېده.
