د افغانستان اسلامي امارت د ملکي محاکمو د امنیتي قطعاتو لپاره نوی رئیس ارکان معرفي شو
د روان ۱۴۴۵ هــ ق کال د ربیع الثاني میاشتې په ۲۲مه نېټه د قضائیه قوې د محاکمو د امنیتي او اجرائیوي چارو عمومي ریاست د رهبرۍ د لزوم دید له مخې ښاغلی الحاج مولوي احمدالله (میوندوال) د ملکي محاکمو د امنیتي قطعاتو د عمومي قوماندانۍ د رئیس ارکان په حیث وټاکل شو او په رسمي ډول یې دنده پیل کړه.
د نوموړي د معرفت په غونډه کې چې د قضائیه قوې د ملکي محاکمو د امنیتي قطعاتو قوماندانۍ په انګړ کې ترسره شوه د قضائیه قوې د امنیتي او اجرائیوي چارو عمومي ریاست رئیس محترم الحاج مولوي محمد عوض (سعید)، د ملکي محاکمو عمومي قوماندان محترم مولوي عبدالله (عزام)، د سترې محکمې د امنیتي قطعې قوماندان محترم ملا عزت الله (مدثر)، د تفتیش او کنټرول مدیر محترم مفتي عبدالرؤف (یوسف)، د یاد ریاست د دفتر عمومي مدیر محترم مولوي خان محمد (مستغفر )، د پېژند عمومي مدیر محترم مولوي نور محمد (قتیبه)، د مطبوعاتو آمر مولوي حبیب الرحمن (روحاني)، د محاسبې مدیریت مرستیال محترم مولوي محمد اسماعیل (ناظم) او ځینې نورو مجاهدینو او مسؤولینو هم ګډون درلود.
د غونډې ګډونوالو ته د سترې محکمې د دعوت او ارشاد ریاست مدرس مولوي عبدالله جان وینا وکړه وویل، دنده امتیاز نه بلکې امانت دی او امانت به اهل خلکو ته سپارل کیږي.
مولوي عبدالله جان زیاته کړه، که مسؤولیت اهل کسانو ته ونه سپارل شي نو هم به الله تعالی راڅخه نا راضه وي او هم به د ملت آه او آزار راپسې شي.
همداراز د ملکي محاکمو د قوماندانۍ رئیس ارکان محترم مولوي احمدالله (میوندوال) په خپله وینا کې وویل، له الله تعالی څخه مرسته او کومک غواړو چې ګران هېواد او خلکو ته د خدمت کولو توفیق راکړي او ان شاءالله ګران هېواد او ملت ته به د ژوند تر وروستیو سلګیو پوره ــ پوره خدمت کوو؛ ځکه زموږ ملت له سختو ناخوالو راوتلی دی، زیات دردونه یې لیدلي او اوس د خدمت او د ملت د هوساینې وخت رارسېدلی دی.
غونډه د مولوي خان محمد مستغفر په اختتامیه دعا پای ته ورسېده.
