د لغمان ولایت مرافعه محکمې رئیس د یاد ولایت پنځو ولسوالیو له ابتدائیه محاکمو څخه لیدنه وکړه

د لغمان ولایت مرافعه محکمې رئيس محترم مولوي عبدالکریم (حقاني)، د روان ۱۴۴۶هـ ق کال د رمضان المبارک میاشتې له ۱۵ څخه تر ۱۹مې نېټې پورې، د تحریراتو آمر شفیع الله (عابد) او د حقوقو آمریت مسلکي غړي قاري ارشاد الله په ملتيا د ښاري ابتدائیه محکمې په ګډون د دولت شاه، الیشنګ، الینګار، قرغه‌يي او بادپښ ولسوالیو له ابتدائیه محاکمو څخه لیدنه وکړه.
 د مرافعه محکمې رئیس د یادو محاکمو له اداري او قضائي چارو څخه له نږدې څارنه وکړه، د یادو محاکمو د اصولو مطابق چارې يې وستایلې او د چارو د لا بهبود په موخه یې ورته لازمې لارښوونې وکړې.
د ليدنې په دوام د مرافعه محکمه رئيس د یادو محاکمو مسؤولينو ته په خطاب کې وویل، په ټاکلي وخت خپلو دندو ته راځئ، په حاضرۍ کې هېڅ ډول غفلت مه کوئ، باید د نن ورځې کارونه سبا ته پاتې نشي؛ ځکه چې د سبا ورځې لپاره نور کارونه وي، نو که چېرته د نن او سبا سره یوځای شي، د کارونو حجم زیاتېږي او له دې امله په چارو کې نيمګړتياوې او ستونزې رامنځته کېږي.
دغه راز د مرافعه محکمې رئيس ټينګار وکړ، چې د تل په څېر خپلې چارې په صداقت او ایماندارۍ سره په شفافه بڼه سرته رسوئ او له مراجعینو سره نېک چلند کوئ.
د یادونې وړ ده چې د مرافعه محکمې رئیس د دې لیدنو موخه ورځنیو چارو ته د محاکمو د مسؤولینو او منسوبینو متوجه کول و چې د مراجعینو کارونه په ټاکلي وخت د اصولو په رڼا کې ترسره کړي؛ ترڅو خدای مه کړه د دې کړېدلي او زورېدلي ملت کارونه د ځنډ او خنډ سره مخ نشي.