په ننګرهار ولايت کې يوه متهم ته تعزیري سزا ورکړل شوه

د ننګرهار ولايت سرخرود ولسوالۍ ابتدائیه محکمې د پرېکړې له مخې يو کس ته چې پر غلا متهم و؛ په ۲۱/ ۱۰/ ۱۴۴۷ هـ ق نېټه تعزیري سزا ورکړل شوه.
ابتدائیه محکمې یاد متهم پر يو کال تنفيذي بند او ۳۹ دُرو تعزیري سزا محکوم کړی و؛ چې یاد پرېکړه د سترې محکمې عالي مقام له تائيد وروسته تطبيق شوه.
په دې موخه جوړه شوې غونډه چې د یادې ابتدائیه محکمې قضائي غړو او اداري کارکوونکو، د نورو امارتي ادارو استازو او عامو خلکو په کې ګډون درلود، د قرآنکریم د څو مبارکو آیاتونو په تلاوت پيل شوه.
ورپسې د دې ابتدائیه محکمې رئیس مفتي جلال الدین (حقاني) د غونډې ګډونوالو ته تفصیلي وینا وکړه وویل، الحمدلله په افغانستان کې اسلامي شرعي نظام قایم دی، د ټولو افغانانو هیلې په همدې اسلامي نظام پورې تړلې دي او هر هغه څوک چې د شریعت خلاف کړنې ترسره کوي، هغو ته به د شریعت مطابق جزا ورکول کېږي.
نوموړي زیاته کړه، د اسلامي نظام بقاء د اسلامي احکامو په تطبیق کې ده.