د کندهار ولایت مرافعه محکمې رئیس د یاد ولايت د ارغستان او معروف ولسوالیو له ابتدائیه محاکمو څخه لیدنه وکړه
د کندهار ولایت مرافعه محکمې عمومي رئیس محترم شیخ محمد (محمدي)؛ د عامه امنیت دېوان عضو محرر مستشار مولوي عبدالستار، د قطعې قوماندان مولوي نعمت الله او د یادې قطعې اداري مسؤول حبیب الرحمن په ملتيا، د روان ۱۴۴۷هـ ق کال د جمادی الأولی میاشتې په ۲۷ مه او ۲۸ مه نېټه،د یاد ولايت د ارغستان او معروف ولسوالیو له ابتدائیه محاکمو څخه لیدنه وکړه.
د لیدنې په پیل کې د مرافعه محکمې رئیس د یادو محاکمو له قضائي او اداري منسوبینو او دغه راز د معروف ولسوالۍ د ولسوال، امنیه قوماندان، امر باالمعروف، نهی عن المنکر او شکایاتو اورېدو او د استخباراتو له مدیرانو سره د همغږۍ ناسته وکړه.
په ناسته کې د مرافعه محکمې رئیس د ارګانونو ترمنځ پر همکارۍ ټینګار وکړ وویل، د کارونو د لا ښه سمون او د هېوادوالو ستونزو د حل په موخه باید وخت پر وخت د همغږۍ غونډې وشي، ترڅو د دغه غونډو له لارې ستونزی حل او فصل شي.
دغه راز یاد پلاوي د محاکمو له قضائي او اداري اجراآتو ارزونه وکړه، الحمدلله چارې يې د اصولو مطابق وې او د چارو د لا ښهوالي په موخه ورته لازمې سپارښتنې او لارښوونې وشوې.
