د لغمان ولايت مرافعه محکمې رئيس په مشرۍ اداري غونډه وشوه

د لغمان ولایت مرافعه محکمې رئیس محترم مولوي عبدالکریم (حقاني) په مشرۍ؛ د مرافعه محکمې دېوانونو رئیسانو او اختصاصي محکمې رئيس په ګډون په ۱۰/ ۹/ ۱۴۴۶ هـ ق نېټه اداري غونډه ترسره شوه.
غونډه د قرآنکريم د څو مبارکو آياتونو په تلاوت پيل شوه؛ ورپسې د مرافعه محکمې رئیس وینا وکړه او ګډونوالو ته په خطاب کې وویل، ټولې چاري مو باید د اسلام مقدس دین پر اساس په شفاف ‌‌ډول ترسره شي، د خلق الله کارونو ته باید د امکان ترحده ژر تر ژره رسېدنه وشي او ډېره هڅه وشي چې رسمي چارې په ‌‌ډېر دقت ترسره شي، ترڅو له نېمګړتياوو څخه محفوظ وي.
دغه راز نوموړي د غونډې ګډونوالو ته د حاضرۍ په پابندۍ ټينګار وکړ؛ ترڅو د مراجعینو کارونو ته په خپل وخت رسېدنه وشي.
د غونډې په دوام په هغه استهدآګانو چې د یاد ولايت له اړونده محاکمو څخه را لېږل شوي وي بحث وشو او په اړه یادو محاکمو ته لازم هدایات ورکړل شول.
غونډه د دعا په ویلو پای ته ورسېده.