د کابل مرافعه محکمې عمومي رئيس د نشه يي توکو څخه د مخنیوي ابتدائیه محکمې او د درېیو ولسوالیو له ابتدائیه محاکمو څخه ليدنه وکړه
د روان ۱۴۴۵هـ ق کال د رجب المرجب مياشتې په ۹مه او ۱۰مه نېټه د کابل ولایت د مرافعه محکمې عمومي رئیس محترم مفتي ذبېح الله (ساجد) او د تحريراتو عمومي مدير عنایت الرحمن (صافي) د کابل ولایت د نشه يي توکو څخه د مخنیوي ابتدائیه محکمې او د کلکان، میربچه کوت او قره باغ ولسوالیو له ابتدائیه محاکمو او نظارت خانو څخه لیدنه وکړه.
د لیدنې او نظارت پر مهال د هرې محکمې د ځینو دوسيو، د ټولو اداري کتابونه څارنه او په یادو محاکمو کې د اجرا شویو او تر کار لاندې دوسیو شمېر یاداشت شو.
د ليدنې په دوام د مرافعه محکمې رئيس په اداري کتابونو کې د طرزالعمل سره سم د اجراآتو نه کول، دوسیو ته د رسېدنې پر مهال شته ضروري موارد په ګوته او د حل په موخه یې ورته لازمې لارښوونې وکړې.
د يادې ليدنې په وروستيو کې د مرافعه محکمې رئيس تر نظارت لاندې کسانو د ساتنې ځایونه له نږدې وکتل، د یادو کسانو ستونزې يې واورېدې او مسؤولينو ته یې د اسانتیاوو برابرولو په موخه لازمې لارښوونې وکړې.
