د روزګان د مرافعه محکمې رئیس د دغه ولایت د چورې ولسوالۍ له ابتدائیه څخه محکمې لیدنه وکړه
د روان هجری قمري کال د رجب میاشتې په ۱۶مه نېټه د روزګان ولایت د استیناف محکمې رئیس محترم شیخ مولوي سخیداد (ابوالتقي) او ورسره مل پلاوي (د ښاري ابتدائیه محکمې د دېوان ترافیک مفتي شیخ عبدالباري او د مرافعه محکمې اجرائیه مدیر محب الله(نظري) د دغه ولایت د چورې ولسوالۍ له ابتدائیه محکمې څخه لیدنه وکړه.
د روزګان ولایت د استیناف محکمې رئیس یادې ولسوالۍ ته د سفر پر مهال د دې ولسوالۍ د ابتدائیه محکمې له قاضي، مفتي او محرر سره وکتل، د دوی قضائي ستونزې یې واورېدې او د اجراآتو ارزونه یې وکړه.
محترم شیخ مولوي سخیداد (ابوالتقي) د ابتدائیه محکمې ریاست قضائي پرسونل ته سپارښتنه وکړه چې د خلکو ستونزې او دعواوې اسلامي اصولو او د اسلامي امارت د محاکمو اصولوته په کتو سره حل او فصل کړي؛ د هېچا تر فشار لاندې رانشي او حق حقدار ته وسپاري.
دغه راز د یاد ریاست اجرائیه مدیر د ولسوالۍ د ابتدائیه محکمې د اداري برخې کارکوونکو ته د صادرې او واردې، رسیداتو او اندراج اړوند لازمې لارښوونې وکړې.
په دې سربېره محترم شیخ مولوي سخیداد (ابوالتقي) د چورې ولسوالۍ د ابتدائیه محکمې له یو شمېر مراجعینو سره وکتل، د هغوی ستونزې او شکایات یې واورېدل او د مشکلاتو د حل ډاډ يې ورکړ.
د شیخ سخیداد (ابوالتقي) په مشرۍ پلاوي او د چورې ولسوالۍ د ابتدائیه محکمې رئیس مولوي عبدالبصیر د یادې ولسوالۍ د «دیراب» د کلي اړوند هغه ځمکې چې د کوچیانو او سیمې د اوسېدونکو ترمنځ پرې دعوه وه هیئتي وکړه او دواړه لوري يې راوغوښتل او د هغوی مشکلات یې له نږدې څخه واورېدل.
