د عالیقدر امیرالمؤمنین حفظه الله د فرمان په اساس ننګرهار ولایت کې د زندانیانو د دوسیو څېړلو بهیر پیل شو
د روان ۱۴۴۴ هـ ق کال د جمادی الاول میاشتې په ۷مه نېټه د زندانیانو د دوسیو د څېړلو او د هغوی دوسیو ته په ټاکلي وخت د رسېدو برخه کې د عالیقدر امیرالمؤمنین حفظه الله د فرمان د تطبیق په موخه د ننګرهار ولایت د استیناف محکمې، د دغه ولایت د استخباراتو، امنیه قوماندانۍ او مرکزي محبس د مسؤولینو ترمنځ ناسته ترسره شوه.
په یاده ناسته کې چې د استیناف محکمې د رئیس شیخ محمدګلاب (فاروقي) په مشرۍ جوړه شوې وه، د بندیانو د دوسیو او احوالو معلومولو په اړه د عالیقدر امیرالمؤمنین حفظه الله د صادر شوي فرمان په اړه تفصیلي خبرې وشوې.
د یادو خبرو په نتیجه کې د شیخ محمدګلاب (فاروفي) په مشرۍ د یادو ادارو ګډ کمېسیون جوړ شو او په (۸ /۶ /۱۴۴۴ هـ ق) نېټه یې په عملي ډول له مرکزي زندان څخه کار پیل کړ.
د یادونې وړ ده چې یاد کمېسیون به هره اونۍ کې درې ورځې (یک شنبه، سه شنبه او پنجشنبه) له زندانونو لیدنه کوي، هڅه به وکړي چې د زندانیانو دوسیو ته په ټاکلي وخت رسېدنه وشي او زندان کې هېڅ بندي بې برخلیکه پاتې نه شي.
