د سترې محکمې د اجراآتو ارزونې او ظرفیت لوړونې ریاست لخوا د کابل ولایت مرافعه محکمې اړوند اداري کارکوونکو ته سيمينار پيل شو

د سترې محکمې د اجراآتو ارزونې او ظرفیت لوړونې ریاست لخوا د کابل ولایت مرافعه محکمې د دېوانونو اداري کارکوونکو ته د اداري اجراآتو د زده کړې تر سرلیک لاندې سیمینار چې د واردې او صادرې کتاب، اندراج، رسیداتو، پلان جوړونې، راپور جوړونې او داسې نور اړین موضوعات په کې تدریس کېږي؛ په ۲۶ /۶ /۱۴۴۶هـ ق نېټه پیل شو.
په دې موخه جوړه شوې غونډه د قرآنکریم د څو مبارکو آیاتونو په تلاوت پیل شوه؛ ورپسې د اجراآتو ارزونې او ظرفیت لوړونې ریاست مسلکي استاد مولوي صفت الله (محسن) د سیمینار په تړاو هر اړخیز معلومات وړاندې کړل.
د غونډې په دوام د مرافعه محکمې عمومي رئيس محترم مفتي ذبیح الله (ساجد) ګډونوالو ته په وینا کې وویل؛ کوم کارکوونکي چې په دغه سیمینار کې ګډون لري، ډېری یې کلونه کېږي چې په محاکمو کې دندې ترسره کوي او په اداري اجراآتو تر ډېره پوه دي، خو په اداري کتابونو کې ځينې نوښتنونه منځته راغلي، یا یو لړ موارد ترې کم شوي او د کارکوونکو لپاره دغه موضوعات نوي دي، نو ځکه د ټولو محاکمو د اجراآتو د یووالي لپاره باید اداري کارکوونکي په سیمینار کې په ښه لیوالتیا ګډون وکړي.
محترم ساجد زیاته کړه، ډېره اړینه ده چې اداري اجراآت په دقیقه توګه زده کړل شي، ترڅو په راتلونکي کې له ستونزو سره مخ نه شو.
د یادونې وړ ده چې په یاد سیمینار کې به شاوخوا (۶۰) تنه اداري کارکوونکي په دوو دورو کې ګډون کوي؛ چې د هرې دورې موده به پنځه ورځې وي.
له اړينو لارښوونو او خبرو وروسته یاد سیمینار په رسمي ډول پیل شو.