د ميدان وردګ ولايت په چک ولسوالۍ کې د مقتول کورنۍ قاتل ته بخښنه وکړه
د روان ۱۴۴۵ هـ ق کال د ربيع الاول مياشتې په ۱۸مه نېټه د ميدان وردګو ولايت د چک ولسوالۍ د ابتدائيه محکمې په هڅو او کوښښ د مقتول کورنۍ قاتل ته د قصاص بخښنه وکړه.
د قتل په ياده پېښه کې احمد هلال د محمد يوسف زوی د شیرين دل لمسي چې د ميدان وردګ ولايت د چک ولسوالۍ د دورانخېلو د کلي اصلي او فعلي اوسېدونکی دی، محمد منصور د رحيم الله زوی د بسم الله لمسی چې د ميدان وردګو ولايت د چک ولسوالۍ د دورانخېلو د کلي اصلي او فعلي اوسېدونکی و د دوشنبې په ورځ د خپل کور په مېلمستون کې د ورځې په ۶ بجو د تفنګچې په واسطه په قتل رسولی و.
د يادو کسانو دوسيه د پېښې له رامنځته کېدو وروسته د چک ولسوالۍ ابتدائيه محکمې ته په رسمې ډول راجع او د يادې محکمې لخوا په غور او دقت وڅېړل شوه.
وروسته د چک ولسوالۍ د ابتدائيه محکمې په هڅو او د ديني علماء کرامو، قومي مشرانو په منځګړيتوب د مقتول کورنۍ قاتل ته د قصاص څخه بخښنه وکړه او قضيه يې په رسمي ډول حل شوه.
په وروستیو کې دواړو لوريو د محکمې له پرېکړې خوښي او پوره رضايت څرګند کړ.
