د لوګر ولایت د مرافعه، ښاري او ولسوالیو محاکمو د رئیسانو ترمنځ اداري ناسته ترسره شوه

په 1 /6 /1444هـ ق نېټه د لوګر ولایت د استیناف محکمې په ریاست کې د دې محکمې د سرپرست رئیس محترم مولوي فضل الرحیم (عابد) په مشرۍ د محاکمو د مسؤولینو ترمنځ اداري ناسته ترسره شوه.

یاده غونډه چې د استیناف محکمې، ښاري او ولسوالیو ابتدائیه محاکمو رئیسانو په کې ګډون کړی و، د کلام الله په تلاوت او د الله (جل جلاله) په ثنا اوصفت سره پیل شوه، ورپسې د استیناف محکمې رئیس حاضرینو ته د قضائي او اداري مسؤولیتونو په اړه لازمې او مهمې سپارښتنې وکړې.

نوموړي وویل، په محاکمو کې د کار ډېرښت د دې ښکارندويي کوي چې ولس د اسلامي امارت په قاضیانو د عدالت باور لري، په همدې خاطر هره وړه او غټه ستونزه تر محکمې رارسوي او له محاکمو یې حل غواړي، موږ باید خپل ولس ناهیلی نه کړو او تر خپله وسه دوسیې په چټکتیا، ځیرکتیا او د اسلامي شریعت په رڼا کې حل کړو.

نوموړي مسؤولینو ته لارښوونه وکړه چې په کار کې دې پوره اخلاص کوي او د خپل کار یوازینۍ موخه دې د الله (جل جلاله) رضا او دې ځورېدلي ولس خدمت وګرځوي.

ورپسې د استیناف محکمې، ښاري او ولسوالیو ابتدائیه محاکمو رئیسانو په نوبت خپلې ستونزې د استیناف محکمې له رئیس او د ناستې له حاضرینو سره شریکې کړې چې د حل په موخه یې د قضائي رئیسانو ترمنځ پراخ بحث ترسره شو.

په پای کې دوی ته ډاډ ورکړل شو چې د قضائي تشکیل د منسوبینو ټولو ستونزو ته به د امکان ترحده رسېدنه کوي او د کارونو د چټکتیا او تنظیم لپاره به ټول لازم امکانات ورته برابروي.

د غونډې اختتام حاکم اسلامي نظام ته د بقاء او د مسؤولیتونو د ښه ترسره کېدو لپاره په دعا سره وشو.