د لغمان په قرغیو ولسوالۍ کې شپږو مجرمنیو ته تعزیري سزا ورکړل شوه
نن چهارشنبه د ۱۴۴۴ کال د جمادی الثاني میاشتې په څلورمه نېټه د لغمان ولایت د قرغیو ولسوالۍ ابتدائیه محکمې لخوا د یادې ولسوالۍ په انګړ کې د یوې ښځې په ګډون شپږو مجرمینو ته د لواطت او نامشروع اړیکو په جرمونو تعزیري سزا ورکړل شوه.
د تعزیري سزا د تطبیق په موخه جوړه شوې ناسته کې چې د کلام الله مجید د څو مبارکو ایاتونو په تلاوت سره پیل شوه د لغمان ولایت د استیناف محکمې عمومي رئیس، د لغمان مرستیال والي، امنیه قوماندان او نورو لوړ رتبه چارواکو سربېره علماء کرامو او عامو خلکو ګډون کړی وو.
په پیل کې علماء کرامو خپلو ویناوو کې د تعزیري سزا تطبیق د ټولنې د اصلاح او د عوامو د عبرت لپاره یوه مهمه لار وبلله او زیاته یې کړه چې په دې سره به ان شاءالله د فساد کچه تر ډېره راکمه شي.
د غونډې په ترڅ کې د یادو مجرمینو له ډلې څلورو کسانو ته د لواطت، یوه نارینه او یوې ښځې ته د ناروا اړیکو لرلو په جرم تعزیري سزا تطبیق شوه.
یاده غونډه د دعا په ویلو سره پای ته ورسېده
