د سترې محکمې رئیس او قاضي القضات کندهار ولایت ته سفر وکړ

د سترې محکمې رئیس او قاضي القضات محترم شیخ عبدالحکیم (حقاني) نن شنبه (۲۷ /۷ /۱۴۴۴ هـ ق) نېټه کندهار ولایت ته د سفر پر مهال د دغه ولایت له مرافعه محکمې څخه لیدنه وکړه.

محترم شیخ عبدالحکیم (حقاني) صاحب د د غه سفر پر مهال لومړی د کندهار ولایت د مرافعه محکمې له رئیس محترم مولوي عبدالغفار (بحر) او نورو مسؤولینو سره وکتل. 

شیخ صاحب د دې لیدنې پر مهال د مرافعه محکمې د رئیس او نورو مسؤولینو سره د محاکمو په چارو کې د لا شفافیت رامنځته کولو او په اصولي توګه د هیوادوالو دوسیو ته د رسېدنې په تړاو تفصیلي خبرې وکړې، د دوی نظرونه او مشکلات یې واورېدل.

دغه راز محترم شیخ عبدالحکیم (حقاني) صاحب د مرافعه محکمې مسؤولینو ته هدایت وکړ چې ټولو هغو دوسیو ته چې محکمې ته راجع کېږي پر ټاکلي وخت شفافه، اصولي او شرعي توګه رسېدنه وکړئ.

دغه راز شیخ صاحب له ظالم څخه مظلوم ته د حق په سپارلو د ټینګار ترڅنګ وویل، د هېچا مرتبې او مقام ته مه ګورئ، له ټولو مجرمانو سره (که لوړپوري چارواکي او که عادي کسان وي) د شریعت او قانون مطابق چلند وکړئ.

پر دې سربېره د سترې محکمې رئیس او قاضي القضات د محاکمو د چارو د لا بهبود په خاطر د یادې محکمې مسؤولینو ته ځینې لازم هدایات او سپارښتنې وکړې.