د زابل د مرافعه محکمې رئيس په مشرۍ اداري غونډه وشوه
د ۱۴۴۵ ھ ق کال د جمادی الثانيه مياشتې په ۱۱مه نېټه د زابل ولایت د مرافعه محکمې د رئيس ښاغلي مفتي عبدالجليل (سفيان) په مشرۍ د اړوند محکمې د دېوانونو، آمريتونو د مسؤولينو، غړيو او د ښاري محکمې د رئيس په ګډون اداري غونډه ترسره شوه.
غونډه د قرآنکريم د څو مبارکو آياتونو په تلاوت پيل شوه؛ ورپسې د مرافعه محکمې رئيس د غونډې ګډونوالو ته د ښه راغلاست ترڅنګ په چارو کې د بريا غوښتنه وکړه، د خپلو خبرو پرمهال يې وويل، موږ او تاسو به د کارونو د ښه اجرا او پر وخت ترسره کېدو لپاره اونۍ کې يو ځل ناسته کوو، تر څو د دندو پر مهال د موجوده ستونزو د حل لپاره مناسبې حل لارې پيدا کړو.
ورپسې يې د عالیقدر اميرالمؤمنين (حفظه الله) هدايت د مجلس ګډونوالو ته بيان کړ ( تاسو باید په اړوند ادارو کې د مراجعينو د ستونزو په حل کې پوره هڅه وکړئ، ستاسو دروازې بايد د مراجعينو پر مخ خلاصې وي او په قضائي او اداري چارو کې آسانتياوې ورته جوړې کړئ).
د مرافعه محکمې رئيس د غونډې ګډونوالو ته لاندې سپارښتنې وکړې:
۱ـ موږ او تاسو باید د عامو خلکو په خاص ډول هغه څوک چې دعوې يې د محاکمو په جريان کې وي، له مېلمستياوو او بې ځايه ناستو څخه د امکان تر حده ځانونه وساتو.
۲ـ موږ او تاسو باید د فيصلو په حکم کې د کومو امارتي ادارو د مسؤولينو، شتمنو او قومي مشرانو تر تاثير لاندې را نشو، بلکې د اسلامي امارت د اصولو او د محاکمو استقلالیت په پام کې نيولو سره خپلې ټولې چارې د اصولو مطابق ترسره کړو.
د غونډې په ورستيو کې ځينې موضوعات غونډې ته وړاندې شول، تر څو د يادو موضوعاتو د حل لپاره د ګډونوالو نظر واخلي؛ ټولو ګډونوالو په خپل وار سره خپل نظرونه وړاندې کړل.
غونډه د دعاء په ويلو پای ته ورسېده.
