د قضائي تفتیش عمومي ریاست مفتشینو د خوست ولایت له محاکمو او مرکزي زندان څخه لیدنه وکړه

د سترې محکمې د محترم مقام په هدایت د قضائي پلټنې د عمومي ریاست یوه مؤظف پلاوي د محترم مولوي سیداسحاق (سادات) په مشرۍ؛ چې مولوي صبغت الله (ناظم) او مولوي کمال الدین (متقي) يې غړيتوب درلود؛ د روان 1447هـ ق کال د رجب المرجب میاشتې په 10مه نېټه خوست ولایت ته د محاکمو د تېرو فعالیتونو د څېړنو په موخه سفر وکړ.
یاد پلاوي د ليدنې په پیل کې د دغه ولایت د مرافعه محکمې له رئیس سره وکتل؛ ورپسې يې د بندیانو ستونزو د څېړلو په موخه له مرکزي زندان څخه لیدنه وکړه، د یاد محبس بندیان يې ولیدل، کومو بندیانو چې شکایتونه درلودل، شکایتونه يې له ځان سره ولیکل او بیا يې له اړوند محاکمو سره شریک کړل.
پلاوي د خپل کاري پلان له مخې د یاد ولایت د (11) ولسوالیو له ابتدائیه محاکمو، د حقوقو مدیريتونو، د ښاري او مرافعه محاکمو اړوند دېوانونو، وثایقو، مخزن او حقوقو آمریتونو، اختصاصي او نظامي محاکمو څخه جلا جلا لیدنه وکړه.
نوموړي پلاوي د پلټنې بهیر په جریان کې د یادو محاکمو د قضائي، اداري او مالي چارو هر اړخیزه پلټنه وکړه؛ د محاکمو د قضائي او اداري پرسونل د سلوکي او مسلکي اړخونو معلومات يې واخیستل او د چارو د سمون په برخه کې ورته لازمې لارښوونې وشوې.
دغه راز یاد پلاوي د محاکمو اړوند شته ستونزې، کاري خنډونه او نیمګړتیاوې له ځان سره یادداشت کړل او په پای کې یې د ستونزو د حل، د خنډونو له منځه وړلو او د نېمګړتیاوو د اکمال په اړه د خوست ولایت د مرافعه محکمې له مقام سره تفاهمي ناسته وکړه او ټولې ستونزې يې په جلا جلا توګه ورسره شریکې کړې. 
د پلټنې پلاوي د خپل سفر په جریان کې د یاد ولایت له محترم والي، د ولسوالیو له مسؤولینو سره ناستې وکړې او د محاکمو فعالیتونو د لاښه پرمختګ او ځینو اړونده ستونزو د حل په موخه یې د هغوی نظرونه واورېدل.
د قضائي پلټنې پلاوي سفر د 1447 هـ ق کال د رجب المرجب میاشتې په 23مه نېټه پای ته ورسېد.