د پکتیکا ولایت وازېخوا ولسوالۍ ابتدائیه محکمې مسؤولينو په هڅو د قتل موضوع حل او فصل شوه
د پکتیکا ولایت وازېخوا ولسوالۍ ابتدائیه محکمې د مسؤولینو په هڅو، د علماء کرامو او قومي مشرانو په منځګړیتوب، په ۲۰/ ۴/ ۱۴۴۷ هـ ق نېټه د قتل رامنځته شوې موضوع حل او فصل شوه.
یاده موضوع شپږ میاشتې وړاندې د وازېخوا ولسوالۍ بازار کې د دوو کورنیو ترمنځ رامنځته شوې وه؛ چې په نتیجه کې یې یو تن وژل شوی و.
دغه موضوع ابتدائیه محکمې ته تر راجع کېدو وروسته په غور او دقت وڅېړل شوه، وروسته د مسؤولينو په ډېرو هڅو، علماء کرامو او قومي مشرانو په منځګړيتوب دواړو طرفونو سولې ته غاړه کېښوده.
دغه د قتل موضوع د جانبینو تر رضایت وروسته د يوې غونډې په ترڅ کې چې د سيمې علماء کرامو، قومي مشرانو او سپینږیرو هم په کې ګډون درلود، د مقتول د وارثينو لخوا د قاتل په بخښنې سره په رسمي ډول پای ته ورسېده.
