د سترې محکمې د جزا دېوان عمومي رئیس پکتیا ولایت ته د سفر پر مهال د (۷) جزائي موضوعاتو اړوند نهايي څېړنې بشپړې کړې

د سترې محکمې د جزا دېوان عمومي رئیس محترم مفتي عتیق الله (دروېش) د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت، په ۲/شعبان المعظم/۱۴۴۶ هـ ق نېټه د یو شمېر مهمو جزائي دوسیو په اړه د وروستیو څېړنو د بشپړولو په موخه پکتیا ولایت ته سفر وکړ.
د سترې محکمې د جزا دېوان رئیس چې مفتي عبدالحی شاکر او مفتي فضل الرحمن (قاسمي) یې ملتیا کوله پکتیا ولایت ته د دغه سفر پر مهال یاد ولایت کې د (۷) مهمو جزائي دوسیو [شپږ د قتل او  یوه د مجروحیت] په اړه وروستۍ څېړنې بشپړې کړې.
دغه راز محترم مفتي عتیق الله (دروېش) په یاد سفر کې د پکتیا ولایت د محاکمو له اړوند قضائي غړو سره وکتل او د جزائي موضوعاتو د حل او فصل په موخه یې تر تفصیلي خبرو وروسته ورته لازم هدایات وکړل.
د سترې محکمې د جزا دېوان عمومي رئیس د جزائي دوسیو له جانبینو سره هم وکتل او له هغوی یې د دوسیو په اړه وروستي بشپړ تحقیقات وکړل.
د یادونې وړ ده چې د سترې محکمې د جزا دېوان عمومي رئیس محترم مفتي عتیق الله (دروېش) له دې مخکې هم د جزائي دوسیو په اړه د وروستیو تحقیقاتو بشپړولو په موخه د هېواد یو شمېر نورو ولایتونو ته سفرونه کړي دي.