د سترې محکمې د دعوت او ارشاد ریاست رئیس د یوه پلاوي په مشرۍ د ختیځ زون ولایتونو ته سفر پیل کړ
د سترې محکمې د دعوت او ارشاد رئیس محترم مولوي عبدالعزیز (میوندي) د یوه پلاوي په مشرۍ یکشنبې (۵/۳/۱۴۴۶ هـ ق) نېټه د هېواد ختیځ زون څلورو (کونړ، نورستان، لغمان او ننګرهار) ولایتونو ته د مرافعه محاکمو لپاره د دعوت او ارشاد آمرینو د ټاکلو په موخه سفر پیل کړ.
د دعوت او ارشاد رئیس او ورسره مل پلاوی به یادو ولایتونو ته د سفر پر مهال د مرافعه محاکمو لپاره د دعوت او ارشاد آمرینو د ټاکلو په موخه له لسګونه دیني علماء کرامو ازموینه واخلي او د ازموینو د پایلو پر اساس به یادو بستونو ته وړ او مسلکي کسان وګوماري.
په دې سربېره به د دعوت او ارشاد ریاست دغه پلاوی د یادو ولایتونو د مرافعه محاکمو له قضائي او ادارو غړو سره اصلاحي ناستې وکړې او د یادو محاکمو کارکوونکو ته به اصلاحي ویناوې وکړې.
د یادونې وړ ده چې د سترې محکمې د دعوت او ارشاد ریاست پلاوي له دې مخکې د هېواد یو شمېر نورو ولایتونو ته هم سفرونه کړي او د مرافعه محاکمو لپاره د دعوت او ارشاد د آمرینو د ټاکلو په موخه یې له لسګونو دیني علماء کرامو څخه ازموینه اخیستې ده.
