د سترې محکمې د جنوب لوېدیځ زون د تفتيش عمومي رياست پلاوي د هرات له محاکمو ليدنه وکړه

د سترې محکمې د جنوب لوېدیځ زون د تفتیش عمومي ریاست د قضائي معاون په مشرۍ د دغه ریاست یوه څلور کسیز پلاوي د روان ۱۴۴۵ هـ ق کال د جمادی الأولی میاشتې په درېیمه نېټه  د یاد زون د تمیز ریاست او د سترې محکمې د قضائي معاونیت د محترم مقام د هدایت په اساس د خپل تفتیشي پلان له مخې هرات ولايت ته سفر وکړ.
د قضائي تفتیش دغه پلاوي د محاکمو د تېرو فعالیتونو د څېړنې او ارزونې په موخه د هرات ولایت غوريان، کشک کهنه، ادرسکن، زاول، فارسي، شينډنډ، ګلران، رباط سنګي، کوهسان، انجيل، ګذره او کړوخ ولسوالیو ته سفرونه وکړل.
د قضائي تفتیش پلاوي د خپل طرزالعمل مطابق د یادو ولسواليو له محاکمو لیدنه وکړه، د ولسواليو د ابتدائیه محاکمو فیصلې یې په دقت مطالعه کړې، د یادو محاکمو په فیصلو کې مهم ملاحظات یې له ځان سره نوټ او له اړوند مسؤولینو سره یې شریک کړل.
ياد پلاوي د ولسواليو د ابتدائیه محاکمو د عريضو د ثبت کتابونه، د حقوقي، جزائي دوسيو د ثبت کتابونه، وارده، صادره کتابونه، د رسیداتو کتابونه، د حاضرۍ کتابونه، او درې میاشتنیو راپورونه مطالعه او وڅېړل او په دې برخه کې یې اړوند مسؤولینو ته د لازمو لارښوونو په موخه لنډ مهاله روزنیز پروګرامونه ترسره کړل.
د جنوب لوېدیځ زون د تفتیش ریاست دغه پلاوي د خپل سفر په دوام د بندیانو د وضعیت د څېړلو په موخه د یادو ولسواليو له زندانونو هم لیدنه وکړه، د بندیانو بشپړ شهرت او وضعیت يې له ځان سره وليکل او بیا يې د یادو محاکمو له مسؤولینو سره تفصیلاً شریک کړل.
وروسته دغه پلاوي د یادو ولسواليو له ولسوالانو، امنیه قوماندانانو، د استخباراتو له مديرانو، علماء کرامو او قومي مشرانو سره غونډې وکړې، د محاکمو د تېرو فعالیتونو په اړه يې د یادو قومي مشرانو او ولسواليو د امنيتي برخې له مسؤولينو څخه د قضاء د پرمختګ په اړه نظريات واورېدل او له ځان سره يې وليکل. 
د ذکر شويو ولسواليو د ليدنې او ارزونې په پای کې د جنوب لوېدیځ زون د تمیز ریاست او د سترې محکمې د عالي مقام د قضائي معاونیت د هدایت په اساس (دوه ـ دوه) رسالې، (یوه ـ یوه) رسمي جریده، (دوه ــ دوه) د شرعي نظام په استحکام کې د اطاعت اغیزې چې د مشرتابه له طرفه رالیږل شوي وو دیادو ولسواليو قضائي پلاوي ته ورکړل شوې.
ياد له لاسته راوړنو ډک (۱۰) ورځنی سفر  په ۱۳/ ۵/ ۱۴۴۵ هـ ق نېټه پای ته ورسېد.