د خوست ولايت مرافعه محکمې د نوي رئيس محترم مولوي عين الله (خلیل) د معرفت غونډه وشوه

د خوست ولايت مرافعه محکمې نوی رئيس محترم مولوي عین الله (خليل)؛ په ۲۱/ ۱/ ۱۴۴۷هـ ق نېټه د يوې غونډې په ترڅ کې د یادې محکمې قضائي غړو او اداري کارکوونکو ته ور وپېژندل شو.
په دې موخه جوړه شوې غونډه کې مرستیال والي، د علماوو شورا، د امر بالمعروف، نهی عن المنکر او شکاياتو اورېدو او د کار او ټولنیزو چارو ریاستونو رئیسانو، د محاکمو قضاتو، قضائي غړو او نوور مسؤولینو ګډون درلود.
غونډه د قرآنکريم د څو مبارکو آياتونو په تلاوت پيل شوه؛ ورپسې د علماوو شورا رئیس شیخ انور حسین (حسیني) د قضاتو د دندو او ځانګړتياوو په اړه هر اړخيزه وینا وکړه.
د غونډې په دوام مرستیال والي مولوي محبوب شاه (قانت) خبرې وکړې؛ د پخواني رئیس کارونه یې وستایل او نوي رئیس ته یې د همکارۍ ډاډ ورکړ زیاته یې کړه، چې محاکم د اسلامي نظام لپاره د ستون فقرات حيثیت لري.
دغه راز د مرافعه محکمې پخواني رئیس محترم مولوي امین الله (منیب) وینا وکړه، د تېرو لاسته راوړنو د یادونې ترڅنګ یې نوي رئیس ته ښه راغلاست ووایه.
په وروستیو کې د مرافعه محکمې نوي رئیس وینا وکړه، د قضاء په اهمیت، له ولس سره په ښه چلند او د خلکو ستونزو ته پر وخت رسېدنه يې ټینګار وکړ.
نوموړي د غونډې ګډونوالو ته ډاډ ورکړ چې په شرعي مسؤولیت کې به هېڅ ډول سستي او له حق څخه به درېغ نه کوي.
غونډه د امربالمعروف، نهی عن المنکر او شکاياتو اورېدو رئیس مولوي شراف الدين لخوا د دعا په ویلو پای ته ورسېده.