د غزني ولايت ښاري ابتدائیه محکمې د نوي رئيس محترم مولوي عبدالمجید د معرفت غونډه وشوه
د غزني ولايت ښاري ابتدائيه محکمې نوی رئيس محترم مولوي عبدالمجيد او نورو قضائي غړو د معرفت غونډه په ۲۰/ ۱/ ۱۴۴۷هـ ق نېټه د مرافعه محکمې په ریاست کې ترسره شوه.
غونډه د تحريراتو آمر لخوا د قرآنکريم د څو مبارکو آياتونو په تلاوت پيل شوه؛ ورپسې د مرافعه محکمې د مدني دېوان رئیس صلاح الدین (حقاني) هر اړخیزه وینا وکړه.
د غونډې په دوام د ښاري ابتدائیه محکمې نوي رئيس د تقوا، عدالت او ثبات په اړه وینا وکړه.
دغه راز د مرافعه محکمې عمومي رئیس الحاج مفتي عزیزالله (حیدري) د اطاعت په اړه وینا وکړه؛ نویو مقررو او تبدیل شویو قضاتو ته یې د خدمت د قبولیت دعا ترڅنګ د ناستې ګډونوالو ته د مشورې کولو سپارښتنه وکړه.
نوموړي له مراجعینو سره په ښه چلند او خپلو منځو کې پر همغږۍ او همکارۍ ټينګار وکړ؛ نوي تبدیل شوي قضات او رئيسان يې معرفي کړل.
غونډه د یاد ولایت د دعوت او ارشاد آمر لخوا په اختتامیه دعا پای ته ورسېده.
