د لغمان ولايت مرافعه محکمې رئيس د یاد ولايت د عدليې، کرنې، اوبو لګولو او مالدارۍ ریاستونو له رئيسانو سره وکتل
د لغمان ولایت مرافعه محکمې رئیس محترم مولوي عبدالکریم (حقاني)؛ په ۱۰/ ۹/ ۱۴۴۶ هـ ق نېټه په خپل کاري دفتر کې د یاد ولايت د عدلیې ریاست رئیس مولوي عبدالستار (حماس)، د غصب شويو ځمکو د تشخیص او تثبیت تخنیکي پلاوي او د کرنې، اوبو لګولو او مالدارۍ ریاست رئیس مولوي عبدالستار (محمد) سره لیدنه وکړه.
ليدنه د قرآنکريم د څو مبارکو آیاتونو په تلاوت پیل شوه؛ ورپسې د مرافعه محکمې رئیس راغلو مېلمنو ته ښه راغلاست ووایه.
د غونډې په دوام د کرنې رئیس په خپلو خبرو کې محاکم د اسلامي نظام یو مهم ارګان یاد کړ، د غصب د مخنیوی یاد پلاوي د مسؤولیتونو په اړه یې رڼا واچوله او په اړوند چارو کې یې د تېر په څېر د محاکمو د ښې همغږۍ د دوام غوښتنه وکړه.
دغه راز د عدلیې رئیس په خپله وینا کې د لا ښې همغږۍ په موخه یاده ناسته مهمه وبلله.
د غونډې په وروستيو کې د مرافعه محکمې رئیس د اصولي همکارۍ او همغږۍ ډاډ ورکړ وویل، د لغمان ولایت اړوند ټولو محاکمو ته به بیا هدایت وکړي چې له اړوند ادارو سره په چارو کې لازمه اصولي همغږي کوي.
غونډه د دعا په ویلو پای ته ورسېده.
