د سترې محکمې د امنیتي او اجرائيوي چارو ریاست اړوند مجاهدینو لپاره د معسکر د اوومې دورې افتتاحیه ناسته وشوه

د سترې محکمې د امنیتي او اجرائیوي چارو ریاست اړوند د حضرت خالد بن ولید (رضي الله عنه) د تعلیمي مرکز قوماندانۍ د نظامي زده کړو د اوومې دورې افتتاحیه ناسته، د روان ۱۴۴۷ هـ ق کال د جمادی الآخرة میاشتې په ۲مه نېټه د یاد ریاست په انګړ کې ترسره شوه.
یاده ناسته چې د قرآنکریم د څو مبارکو آیاتونو په تلاوت سره پيل شوه؛ په کې د سترې محکمې د امنیتي او اجرائیوي چارو ریاست د دفتر عمومي مدیر الحاج مولوي خان محمد (مستغفر)، د حضرت خالد بن ولید (رضي الله عنه) د تعلیمي مرکز قوماندان مولوي ابراهیم (برهان) او نورو مسؤولینو او منسوبینو ګډون درلود.
د غونډې ګډونوالو ته د یاد ریاست د دعوت او ارشاد عمومي مدیریت مدرس مولوي عبدالله جان (عابد) د اعداد د ارزښت په اړه وینا وکړه وویل، اعداد د اسلامي نظام د بقاء اصل دی، ځکه خو مؤمنان د الله تعالی له لوري د اعداد په کولو مکلف شوي او د دغه الهي امر په ترسره کولو کې الله تعالی لوی حکمتونه نغښتي دي، اعداد د مجاهدینو د فزیکي وړتیاوو د لوړولو ترڅنګ د مجاهدینو عقیدې لا راسخې او مستحکموي.
نوموړي زیاته کړه، دا چې الله تعالی افغانانو ته له ډېرو قربانیو او ستونزو زغملو وروسته دغه اسلامي نظام ور په برخه کړ، نو د دغه اسلامي نظام د بقاء او لا مستحکم کېدلو لپاره به له هرې ممکنې لارې کوښښ کوو چې اعداد او تدریب وکړو، ترڅو د نظام په وړاندې د هر کېدونکي بغاوت ملا ماته کړو او دغه اسلامي نظام ته د خدمت جوګه شو.
د یادونې وړ ده چې په یاده دوره کې به (۱۳۰) مجاهدینو ته نظامي او عقیدوي روزنه ورکړل شي. 
غونډه د دعاء په ویلو پای ته ورسېده.