د سترې محکمې د جزا دېوان عمومي رئیس د یو شمېر جزائي دوسیو په اړه د وروستیو تحقیقاتو په موخه فاریاب ولایت ته سفر وکړ

د سترې محکمې د جزا دېوان عمومي رئیس محترم مفتي عتیق الله (دروېش) چې محترم مفتي عبدالحی (شاکر) او محترم مفتي فضل الرحمن (قاسمي) یې ملتیا کوله، د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت د روان ۱۴۴۶هـ ق کال د جمادی الآخره میاشتې په دویمه او درېیمه نېټه د یو شمېر مهمو جزائي دوسیو د وروستیو تحقیقاتو د بشپړولو په موخه فاریاب ولایت ته سفر وکړ.
د جزا دېوان عمومي رئیس فاریاب ولایت ته د دغه سفر پر مهال یاد ولایت کې د (۱۱) جزائي دوسیو په اړه وروستي او لازم تحقیقات بشپړ کړل.
محترم مفتي عتیق الله (دروېش) په یاد سفر کې د فاریاب ولایت د مرافعه محکمې له قضائي غړو سره وکتل؛ د جزائي موضوعاتو د حل او فصل په موخه یې ورسره تفصیلي خبرې وکړې.
دغه راز د سترې محکمې د جزا دېوان عمومي رئیس د یاد سفر پر مهال د جزائي دوسیو له جانبینو سره وکتل او له هغوی یې د دوسیو په اړه بشپړ تحقیقات وکړل.
په دې سربېره محترم مفتي عتیق الله (دروېش) او ورسره مل پلاوي د فاریاب له والي محترم مولوي عبدالاحد (فضلي) سره وکتل، د ولایتي ادارو د مسؤولینو ترمنځ د همغږۍ پر تقویې یې تفصیلي خبرې وکړې.