د ننګرهار زون د ابتدائیه نظامي محکمې لپاره د نوي رئیس د معرفت غونډه ترسره شوه
نن دوشنبه د روان ١٤٤٥ هـ ق کال د جمادی الثانیه میاشتې په ١٨مه نېټه د ننګرهار زون د نظامي ابتدائیه محکمې لپاره نوی ټاکل شوی رئیس محترم الحاج مولوي جلیل احمد (هلال) د یاد ولایت د محاکمو مسؤولینو او منسوبینو ته ور وپېژندل شو.
په یاده ناسته کې چې د قرآنکریم د مبارکو آیاتونو په تلاوت سره پیل شوه د سترې محکمې د نظامي محاکمو معاون محترم شیخ خیرجان (خیرخواه) صاحب، د ننګرهار د مرافعه محکمې رئیس محترم مولوي عبدالشکور رشاد (اخندزاده)، د ننګرهار زون د نظامي ابتدائیه محکمې مخکني رئیس محترم الحاج مولوي عین الله (خلیل) او نورو مسؤولینو ګډون درلود.
غونډې ته د سترې محکمې د نظامي محاکمو معاون محترم شیخ خیرجان(خیرخواه) صاحب تر تفصیلي وینا وروسته د ننګرهار زون د نظامي ابتدائیه محکمې نوی رئیس حاضرینو ته ور معرفي کړ.
دغه راز د سترې محکمې د نظامي محاکمو معاون نوي ټاکل شوي رئیس ته ټینګار وکړ چې د اسلامي شریعت په رڼا کې د افغانستان اسلامي امارت قوانین او د عاليقدر امیرالمؤمنین حفظه الله فرمانونه عملي کړي.
محترم شیخ خیرجان (خیرخواه) صاحب د خپلې هر اړخیزې وینا په ترڅ کې نوي ټاکل شوي رئیس ته د ښه خدمت کولو غوښتنه او دعا وکړه.
غونډه د دعا په ویلو پای ته ورسېده.
