د سترې محکمې د جزا دېوان عمومي رئیس د یوه پلاوي په مشرۍ سمنګان، کندوز، تخار، بغلان او بدخشان ولایتونو ته رسمي سفر وکړ
د سترې محکمې د جزا دېوان عمومي رئیس، محترم مفتي عتیق الله (دروېش)، د مفتي عبدالحی (شاکر) او مفتي فضل الرحمن (قاسمي) په ملتیا، د ۱۴۴۸هـ ق کال د محرم الحرام په ۲۸مه نېټه، د سترې محکمې د رئیس او قاضيالقضات محترم شیخ عبدالحکیم (حقاني) صاحب، د ځانګړي هدایت پر بنسټ سمنګان، کندوز، تخار، بغلان او بدخشان ولایتونو ته رسمي سفر وکړ.
د دغه سفر اساسي موخه د (۱۶) جزائي دوسیو په اړه د وروستیو معلوماتو بشپړول وو.
د سترې محکمې د جزا دېوان پلاوي د سفر په ترڅ کې د یادو ولایتونو د مرافعه محاکمو له رئیسانو، د جزا دېوانونو له مسؤولینو او قضائي منسوبینو سره جلا جلا غونډې ترسره کړې، د جزائي قضیو د حل او فصل او د قضائي اجراآتو د لا ښهوالي په اړه یې مفصلې خبرې او بحثونه وکړل.
همدارنګه، د جزا دېوان عمومي رئیس او ورسره مل پلاوي د جزائي موضوعاتو اړوند (۱۶) دوسیې وڅېړلې، د دوسیو له طرفینو سره یې لیدنې وکړې او د قضیو د بشپړې ارزونې په موخه یې لازمې څېړنې او تحقیقات ترسره کړل.
دغه راز، د پلاوي غړو د سمنګان، کندوز، تخار، بغلان او بدخشان له والي صاحبانو سره هم وکتل او د محاکمو او نورو اړوندو امارتي ادارو ترمنځ د همغږۍ او ګډې همکارۍ د لا پیاوړتیا په اړه یې خبرې ورسره وکړې.
د سترې محکمې د جزا دېوان عمومي رئیس په دې لیدنو کې د والي صاحبانو له لوري له محاکمو سره د شوې همکارۍ ستاینه وکړه او د دغې همکارۍ پر دوام یې ټینګار وکړ.
د یادو ولایتونو د محاکمو مسؤولینو، والي صاحبانو او د نورو اړوندو امارتي ادارو مسؤولینو د سترې محکمې د جزا دېوان د عمومي رئیس او ورسره مل پلاوي د سفر هرکلی وکړ او څرګنده یې کړه، چې دغه ډول رسمي سفرونه د قضائي چارو د لا ښه تنظیم، د محاکمو د ورځنیو اجراآتو د پیاوړتیا او له امارتي ادارو سره د همغږۍ او همکارۍ په پراختیا کې اغېزناک او ګټور رول لري.
د یادونې وړ ده، چې د سترې محکمې د دغه لوړ رتبه پلاوي له لاسته راوړنو ډک سفر د صفرالمظفر میاشتې په ۱۰مه نېټه پای ته ورسېد.
