د کابل د مرافعه محکمې عمومي رئیس د يادې محکمې له څلورو دېوانونو لیدنه وکړه
د کابل ولایت د مرافعه محکمې عمومي رئیس محترم مفتي ذبېح الله (ساجد) د ۱۴۴۵ هـ ق کال د جمادی الثانیه میاشتې په (۲۳، ۲۵، ۲۶ او ۲۷)مه نېټه د دې محکمې د جزا، امنیت عامه، مدني او تجارتی دېوانونو له قضائي چارو څخه د څارنې او ارزونې په موخه لیدنې وکړې.
په دې ليدنو کې محترم ساجد د کارکوونکو په تناسب د یادو دېوانونو د دوسیو د شمېر ډېروالی او کموالی، دا چې هر یو قضائي غړي ته څو څو دوسيې ور سپارل شوې، هغوی ور سپارل شويو دوسیو ته په وخت سره رسېدنه کړې او که نه، معلوم کړ.
د ليدنې په دوام يې د ټولو دېوانونو د دوسیو شمېر یادداشت کړ، د دوی مثبت کارونه یې وستایل او د چارو د لا بهبود په موخه یې ورته لازم هدایات وکړل.
د ليدنې په پای کې محترم ساجد د یادو دېوانونو اداري چارې هم وارزولې او اداري کارمندانو ته يې لازمې لارښوونې وکړې.
