د سترې محکمې د جزا دېوان د عمومي رئیس په هڅو بلخ ولایت کې د مقتولې کورنۍ قاتل ته بخښنه وکړه
د سترې محکمې د جزا دېوان عمومي رئیس محترم مفتي عتیق الله (دروېش) د مفتي عبدالحی (شاکر) په ملتیا بلخ ولایت ته د سفر پر مهال د قتل د یوې موضوع له طرفینو سره وکتل او د یاد پلاوي په ترغیب د مقتولې وارثینو قاتل ته بخښنه وکړه.
یاده پېښه چې په نتیجه کې یې یو کس یوه مېرمن په قتل رسولې وه د بلخ ولایت محاکمو ته تر راجع کېدو وروسته د مربوطه محاکمو لخوا په غور او دقت وڅېړل شوه.
ابتدائیه او مرافعه محکمې دغه دوسیه نهايي کړې وه؛ خو د سترې محکمې د جزا دېوان عمومي رئیس او ورسره مل پلاوي د قضیې له طرفینو سره په کتنه کې د مقتولې وارثین د قاتل بخښنې ته ترغیب او وهڅول او په نتیجه کې د مقتولې وارثینو قاتل ته بخښنه وکړه او قضیه یې په رسمي ډول پای ته ورسېده.
د یادې پرېکړې تر ابلاغ وروسته د قضیې دواړو لوریو خوښي څرګنده کړه او قاتل په خپل عمل پېښمانه او د مقتولې له وارثینو یې بخښنه وغوښته.
