د سترې محکمې د جزا دېوان عمومي رئیس جوزجان ولایت ته سفر وکړ
د سترې محکمې د جزا دېوان عمومي رئیس محترم مفتي عتیق الله (دروېش) چې محترم مفتي عبدالحی (شاکر) او محترم مفتي فضل الرحمن (قاسمي) یې ملتیا کوله، د سترې محکمې د رئیس او قاضي القضات محترم شیخ عبدالحکیم (حقاني) صاحب په ځانګړي هدایت د روان ۱۴۴۶هـ ق کال د جمادی الآخره میاشتې په لومړۍ نېټه د یو شمېر مهمو جزائي دوسیو د وروستیو تحقیقاتو د بشپړولو په موخه جوزجان ولایت ته سفر وکړ.
د جزاء دېوان عمومي رئیس جوزجان ولایت ته د دغه سفر پر مهال یاد ولایت کې د (۹) جزائي دوسیو په اړه وروستي او لازم تحقیقات بشپړ کړل.
محترم مفتي عتیق الله (دروېش) په یاد سفر کې د جوزجان ولایت د مرافعه محکمې له قضائي غړو سره وکتل؛ د جزائي موضوعاتو د حل او فصل په موخه یې ورسره تفصیلي خبرې وکړې.
دغه راز د سترې محکمې د جزا دېوان عمومي رئیس د یاد سفر پر مهال د جزائي دوسیو له جانبینو سره وکتل او له هغوی یې د دوسیو په اړه بشپړ تحقیقات وکړل.
په دې سربېره محترم مفتي عتیق الله (دروېش) او ورسره مل پلاوي د جوزجان له والي محترم قاري ګل حیدر شفق سره وکتل، د ولایتي ادارو د مسؤولینو ترمنځ د همغږۍ پر تقویې یې تفصیلي خبرې وکړې.
د سترې محکمې د جزا دېوان رئیس وویل، د هېوادوالو موضوعاتو ته په ټاکلي وخت د رسېدو، جرایمو د مخنیوي او حق حقدار ته د سپارلو لپاره د ولایتي ادارو ترمنځ قوي همغږۍ ته اړتیا ده؛ بناءً د جوزجان ولایت د ټولو اداري مسؤولینو څخه مو غوښتنه داده چې د تېر په څېر قوي همغږي ولري او د همغږۍ د لا تقویې په موخه هڅې وکړي.
د جوزجان والي محترم قاري ګل حیدر شفق په یاد ولایت کې د اداري مسؤولینو ترمنځ د قوي همغږۍ د موجودیت ډاډ ورکړ وویل، د هېوادوالو د ستونزو د حل په موخه به د امارتي ادارو د مسؤولینو ترمنځ د همغږۍ د لا تقویې په موخه نورې هلې ځلې هم وکړي.
